Chief Minister in Airtel 5G Plus Services tlangzarh

Airtel 5G Plus Services chu Chief Minister Zoramthanga chuan nimin khan CM Office Conference Hall-ah a tlangzarh.

Airtel Mizoram buatsaiha Airtel 5G Plus Services tlangzarhna hunah hian Chief Minister chuan Airtel in 5G Plus Service an tlangzarh thei ta chu lawmawm a tih thu leh mipui tan tangkaina tam tak a thlen ngei a rin thu a sawi a. Mizoram chu tlangram a awm a nih avanga inkalpawhna kawng pawh tihhmasawn la ngai, a panna kawng pawh a thui avanga ei leh bara hmasawnna pawh duhthusam a chak theilo a nih laiin, Digital Age-a kan awm chhawr tangkaia, hmun leh hmuna in awmchilh ngei kherlo in, Internet kaltlanga thil tih theih tangkai tak tak a awm ta zel chu malsawmna a nih thu a sawi a. Internet Speed chak zawk chu Healthcare ah te, Agriculture ah te, Education leh Service Sector-ah tangkai taka hman a nih ngei a beisei thu a sawi a. Mizoram pum a 5G coverage a awm thuai theih nan Bharti Airtel chuan hma an lak a beisei thu a sawi bawk.

He huna tarlan a nih danin Airtel hi India hmarchhak-a 5G Service bultan hmasa ber an ni a. 5G Service hi a tahtawl te tein kalpui chhoh tur a ni bawk. Nimin atang khan Zarkawt, Tuikual - North Bawngkawn, New Capital Khatla, Durtlang, Zemabawk, Luangmual, etc. ah 5G hman theihna device (phone, tablet) ah chuan sum chawi belh ngai lovin 5G Network a zawm theih a ni.