Chapchar Kut-ah Business Meeting a tel te sawm dawn

Kumin March 2-a Aizawl-a Chapchar Kut hman turah G20 Business Meeting-a rawn kal turte chu sawm an ni dawn.

    G20 hnuaia Committee pakhat, G20 Business Meeting chu March ni 2 hian Aizawl ah neih a ni dawn a, ram hrang hrang atanga he Meeting avanga rawn kal turte chu March ni 1-ah lo thlengin ni 3-ah let leh tur an ni a. Chapchar Kut Organizing Committee chuan heng Delegates te hi Chapchar Kut chhim ve tura sawm ve nise tiin a lo rel tawh a, nimin khan Chief Minister Zoramthang hovin CM Office Conference Hall-ah Chapchar Kut Organizing Committee OB leh G20 Mizoram Core Committee te chu hemi chungchang ngaihtuah hian an thukhawm a. G20 Meeting Organizer lam pawhin delegates ten Mizo Kut lian ber an telpui chu tha an ti a. Chumi bawhzui chuan Chapchar Kut hman dan tur ruahmanna lo awm sa tawhte thlirho in, siam danglam ngai te siam danglam a ni.

G20 delegates leh State pawn ami te'n Mizo culture an tem ve theihna tur te, mikhual te lo lawm dan tur leh Traffic kal dan turte pawh he hunah hian huamzau taka sawiho a ni a. Heng mikhualte avanga sum sen belh tur mamawh chu Estimate siamin, a remchan anga sawrkar laipui a dil ni se tih a ni bawk.