Latest News

Assembly Deputy Speaker thar atan Lawngtlai East Bialtu MLA H. Biakzaua thlan a ni

Mizoram Legislative Assembly Deputy Speaker atan Lawngtlai East bialtu MLA H. Biakzaua chu chuhtu awm lova thlan a ni a, Deputy Speaker thar hian nimin chawhnu dar 1:00 khan Mizoram Legislative Assembly-a a Pisa thar a luah nghal a ni. 

Mizoram Legislative Assembly Session neih mekah nimin kha Deputy Speaker thlanna neih hun tur niin Deputy Speaker thlanna ah hian MNF Legislature Party in an Candidate H. Biakzaua chiah Nomination paper thehlut a awm a, Assembly Speaker Lalrinliana Sailo chuan H. Biakzaua hi chuhtu awm lovin Deputy Speaker atan thlantlin a ni tih House-ah a puang a, hemi hnu hian Speaker Lalrinliana Sailo, House Leader Zoramthanga leh Opposition Group Leader pahnih Zodintluanga leh Lalduhoma ten a thutna hmun turah an hruai a ni.

Deputy Speaker thar H. Biakzaua chuan Deputy Speaker atana duhsak taka thlan a nih avangin Pathian hruaina leh House Leader bakah Member te hnenah lawmthu sawiin, a bial mipuite chungah lawmthu a sawi bawk a. House-ah Legislature Party hrang hrang a awm chunga Deputy Speaker Nomination File thuah awm lova chuhtu awm lova thlantlin a ni chu lawmawm a tih thu sawiin, Eptu Party te chungah pawh lawmthu a sawi bawk a ni.

Deputy Speaker thar H. Biakzaua hian nimin chawhnu dar 1:00 khan Mizoram Legislative Assembly-a a Pisa thar chu luah nghalin Chief Minister Zoramthanga, Speaker Lalrinliana Sailo, Deputy Chief Minister Tawnluia leh Minister bakah MLA rualten an hmanpui a. Chief Minister Zoramthanga chuan Deputy Speaker atana H. Biakzaua thlantlin a ni chu lawmawm a tih thu sawiin, Deputy Speaker thar chu politics-ah tawnhriat ngah tawh tak a nih thu leh he hna hi a tlin pawh an rin thu a sawi a, “Kan thinlung tak takin kan lawmpui a ni,” a ti a. Speaker Lalrinliana Sailo pawhin Deputy Speaker thar a lawmpui thu sawiin, “A thlamuanthlak ka ti a, duhsakna ka hlan a ni,” a ti bawk.

Mizoram Union Territory a nih atanga chhiarin H.Biakzaua hi Deputy Speaker 17-na niin State a nih hnu atanga chhiarin 12-na a ni thung a. Deputy Speaker ni thin Er. Lalrinawma chu nikum December thla khan bangin Cabinet Minister atana lakluh a nih hnuah Deputy Speaker hmun hi a ruak a, nimin khan Deputy Speaker thlanna hi neih a ni ta a ni. Nimin-a Deputy Speaker lawmpuina hun tawi buatsaihah hian LIKBK Administrative Secretary Rev. Zionvar-mawia Fanchun chuan hunserh a hmang a ni.

Comments

Popular News (Last 30 Days)