Latest News

MSHCS in Household Enumeration an neih tur atan Serchhip District-ah Training nei tan

Mizoram Health Systems Strengthening Project (MHSSP) hnuaia Mizoram State Health Care Society (MSHCS) in Household Enumeration an neih tur atana thawktu tura thlan te tan Serchhip District-ah Training neih mek a ni.
Mizoram mipuite hriselna a lo that zawk theih nana World Bank sum hmanga hmalakna tur, Mizoram Health Systems Strengthening Project (MHSSP) hnuaiah hian hmalakna hrang hrang kalpui niin Mizoram State Health Care Society (MSHCS) chuan Health Care chungchanga mipuite dinhmun hriatchianna nei turin In tinah lut lawrin zirchianna an nei dawn a, he hna thawk turte tana Training hi Serchhip District-ah neih tan niin nimin khan Serchhip Main Centre hnuaia thawktute tan Serchhip CMO Conference Hall-ah Training hi neih a ni a. He hun hi Serchhip CMO Dr. Lalzawmi chuan hmanpuiin Mizoram Health Systems Strengthening Project hmanga Mizoram tanpui tur hian World Bank chu a inhawng em em tih sawiin, he Project a hlawhtlin theihna tur atan hian theihtawp an chhuah a pawimawh tih a sawi a. Tuna Data lakkhawm hna thawh turah hian Veng leh khuaa mipuite hrechiang ber tura ngaih te chu hnathawk tura beisei an nih thu leh an hnathawhna tur atana pawimawh tur an zir te chu uluk taka ngaihtuaha a tha thei ang bera an hna hlenchhuah tum turin a chah bawk a ni.


He Training hi MSHCS Serchhip-a District Co-Ordinator Vanlalrengpuia chuan kaihruaiin Training pe tur hian Mizoram State Health Care Society atangin Accounts Officer Jason L. Renthlei chu a rawn kal a. Department ten Data an neih chu a that tawklohna tam tak a awm thu sawiin, hei vang hian MSHCS in Household Enumeration nei tura hmalakna a kalpui thu leh Department in an mamawh tur Data dang te pawh hemi rual hian lakkhawm a nih dawn thu a sawi a. Hei vang hian Survey neih tur chu a pawimawh hle dawn tih sawiin, Data dik ber nei District ni tura taima tak leh tih tak takna nena thawk tura chahin, Data dik tak kan neih theih nana thawktu an ni tih hriaa theihtawp chhuah turin he huna kalkhawmte chu a chah bawk a ni.

He Survey neih tur atan hian April 3, 2023 hmain Enumerators te chuan an Bial-ah theuh In tin lutin Data hi lakhawmin Sub-Centre ah an thehlut anga, Sub-Centre te hian PHC/CHC-ah thehlutin NHM-a DPM; MSHCS-a District Programme Manager leh MSHCS-a District Coordinator-ah thehluh leh a ni anga, April 28, 2023-ah zofel hman tura ruahman a ni a. He Data lakkhawmna ah hian mipuite tan senso a awm dawn loh thu thawktute chuan sawiin, Data lakhawmtu ten hriat an duh hrang hrangte dik leh felfai taka lo hrilh turin an chah bawk.

Comments

Popular News (Last 30 Days)