Aizawl-a AR ram-ah LSC nei mi 61 an awm

Zonuna Kawlni (LENKAWL) • February 13, 2023 • Comments • Mizoram

Aizawl khawpui lun lai a Assam Rifle luah lai ram chhungah mi 61-in LSC an nei a, an zinga 8 chuan sawrkar-ah an LSC an pelet tawh.

Assembly Session neih mekah VL. Zaithanzama zawhna ziaka a chhanna-ah Land Revenue and Settlement Minister Lalruatkima chuan Aizawl-a Assam Rifles ramchhunga LSC nei, sawrkar hnena hlan let lehtute chu - Lalnunmawii, (Baktawng), Lalzarliana (Bawngkawn South), Thanpari (Khatla), Dr. Sangzuala (Zarkawt), Rochhunga Ralte (Electric Veng), Lalhuthanga (Dawrpui Vengthar), K. Sangnghaki (Bethlehem) leh V. Thlanga (Bethlehem) te an ni a. Assam Rifles Commandant chenna hmunah hian mi 4-in LSC an lo nei a. MacDonald Hill-ah mi 3 LSC nei awmin Assam Rifles Battalion hmun huamchhung ah mi 54-in LSC an nei bawk a ni a ti.

Assam Rifles te’n ram an luah, an chhuahsan tura ruahman chhung hi mipui vantlang tana humhalh a nih theihna atan ‘The Mizoram (Restriction on Use of Transfer Land) Act, 2002’ chu siam a lo ni tawh a. Hei hi Ningani kalta khan Assembly-ah a siamthatna pawm a lo ni leh tawh bawk a ni.