PHH chhungkua te tan buhfai pek belh an ni

Sawrkar laipuiin a thlawna buhfai a sem mek chu PHH chhungkua te tan tun thla atangin kg. 3 zel pek belh an ni dawn.

Nimin-a Assembly inkhawm ah Food, Civil, Supplies & Consumer Affairs Minister K.Lalrinliana chuan Lawngtlai West Bialtu MLA C. Ngunlianchunga zawhna chhangin sawrkar laipuiin a thlawna buhfai kg. 5 a sem mek chu PHH bikah tun thla atang hian kg. 3 zel man neia sem belh anih tur thu House a hrilh a, Ex-MLA leh MDC te quota sawrkarin a pek thin, tihtawp tak chu tun dinhmunah sum harsatna avangin chhunzawm tumna a awm rihlo tih a sawi bawk. 

Champhai North bialtu MLA Dr. ZR. Thiamsanga zawhbelhna chhangin Supply Minister chuan Fortified rice chu buhfai tha bik, taksa tana Vitamin tha pai anih thu leh kumin April thla atangin Mizoram pumah sem a nih tur thu a sawi a. Fair Price Shop tih changtlun nan sawrkar laipuiin hma a la tih sawiin, tunah hian Mizoram chhung hmun 75-ah hmalak mek anih thu leh zawhfel anih chuan Fair Price Shop ten Ration chauh nilo, thildang pawh an zuar tel thei tawh dawn tih House a hrilh a ni. 

Hei bakah hian Supply Minister chuan Myanmar atanga raltlante buhfai pek an nih thu leh a hranpa-in eirawngbawlna Gas erawh chu pek an ni lo tih a sawi a. Mizorama Myanmar raltlante an rawn luh tirh, engkima chhawmdawl an la ngaih hun lai khan Supply Department chuan District hrang hrang Bawrhsap leh DCSO te ruahmanna in an ei tur buhfai quintal 950.06 pek an nih thu leh Department-in raltlan tanpui ngai zat report a dawn zat chu mi 15,981 a ni tih sawiin, Myanmar raltlan awm zat a sawi mi sing thum chuang tih chu a dik zawk thu leh anni chuan buhfai tanpui ngai zat an dawn thu a sawi.