A huna sum pek loh vangin cheng Nuai 22.15 chawi

Kum kal mek 2022-23 chhungin Mizoram sawrkarin Aizawl Municipal Corporation (AMC) hnena a sum hlan/pek tur a hun taka a pek theih loh vangin sawrkarin cheng nuai 22.15 a chawi (penalty interest) tawh.

    Assembly Budget Session neih mekah C. Lalsawivunga zawhna, Finance Department changtu Chief Minister Zoramthangan ziaka a chhan danin, kum 2021-22 chhungin sawrkarin penalty chawi a nei lo a, kum kal mek 2022-23 a cheng Nuai 22.15 a chawi chu Fund Allocation hmangin ni 2.6.2022-ah UD&PA Department-ah pek a ni.

Sawrkarin AMC pawisa hmuh tur a hun taka a pek loh chhan Finance Minister-in a tarlan danin Finance Commision-in Urban Local Body atana pawisa a recommend te chu a zat hriat lawk a nih avangin a Nodal Department UD&PA hnuaiah Advanced Allocation-in Budget Estimate-ah dah sa vek a ni a. Amaherawhchu Fund hi Finance Ministry atanga Actual Release hmuh a nih hma chuan hman theih a ni lo thung.

Hei bakah hian chhanna atanga a lan danin Actual release hmuh a nih veleh Department-in Expenditure Sanction an pawm hnuah Treasury-ah Bill an thehlut a, Treasury atanga pass a nih hnuah a dawng tur Local BodyAizawl Municipal Corporation (AMC)-ah hlanchhawn leh a ni.

Heng kaltlang tur hian hun a duh deuh thin a, Finance Commission guideline-in a phut, ni 10 chhunga a fel hman loh chang a awm thin avangin Penalty chawi a ngai a. Heng bakah hian Treasury-ah System thar, IFMIS hman a ni a, kalphung thlak lai a ni avangin harsatna a awm a, chu chuan hmalakna a ti kal muang ve bawk nia tarlan a ni.