State Level Committee on Standardisation thukhawm

State Level Committee on Standardisation (SLCS) chu nimin khan a vawi khatna atan an Chairman leh Chief Secretary Dr. Renu Sharma hovin Aizawl-a Secretariat Conference Hall-ah an thukhawm.

He thutkhawm ah hian Chief Secretary chuan Bureau of Indian Standards (BIS) chu mipuiten kawng hrang hranga Service an dawnah a tha leh rintlak, an tana him bawk si an dawn theihna tura hmalatu pawimawh tak an ni tih sawiin, Quality Control atana BIS in inkaihruaina leh zawm tura duante chu mipuite pawhin kan tana tha tur a ni tih an hriat a, kan zawm a pawimawh rualin Mizoram sawrkar pawhin kan ngaih pawimawh a ngai a, product tha leh rintlak bakah mipuite himna kan ngaihtuah ve a tul takzet a, sawrkar hnuaia bungrua leh hmanraw supply chungchang ah pawh a theih chin chinah BIS inkaihruaina kan zawm a tul a ni, a ti.

Nimin-a thutkhawm ah hian Mizoram sawrkarin kum 2020-a a lo din tawh Standardisation Cell chu India ramah a din hmasa ber pawl an nih thu BIS hotute chuan sawiin, entawntlak an nih thu an tarlang a, he Cell hian chak lehzuala hma a lak chhunzawm theih dan turte sawiho niin sawrkar, Industry hrang hrangte leh BIS thlunzawmtu a nih avanga a pawimawhzia tarlan a ni bawk.

He hunah hian State sawrkar official ten Standards mumal taka ruahman bakah mumal taka kalpui, a tangkaina enzui leh mipuiten an chhawr tangkai theihna tur atana hma an lak dan tur kawnga chetlak dan turte sawiho a ni a, Tui Connection nei ten BIS quality mil tui thianghlim in tur an dawn ziah dan tur chungchangte, ISI chhinchhiahna tel lo tui intur zawrhchhuah a nih lohna tura hmalak dan turte,ISI chhinchhiahna tel Helmet chauh hralhchhuah a nih theihna tura hmalak dan turte sawiho niin, Mizoram sawrkarin hma a lo lak tawh dante tarlan a ni bawk.

Heng bakah hian rangkachak, tlereuh dangte leh thil hlu dangte a dik leh dik loh chhinchhiah (Hallmarking of gold jewellery and artifacts) chungchangte, BIS Management System Certification Scheme kalpui dan tur chungchangte, India Standards mipuite hriatthiam tura inzirtirna kalpui chungchangte, Sawrkar laipuiin Quality Control Order a tihchhuah a taka kalpui chungchangte sawiho niin zirna In hrang hranga Student Clubs on Quality and Safety din chungchangte sawiho a ni.

BIS hotute chuan ‘BIS CARE’ mobile application an siam thu sawiin, he mobile application hi playstore atangin download theih a ni a, he mobile app kaltlang hian kan thil lei chi hrang hrang - rangkachak, helmet, tui intur (bottle), mobile phone etc. te chu himna kawngah India Standards mil a nih leh nih loh a endik theih tih an sawi bawk.

Comments

Popular posts from this blog