Serchhip-a MNF ten kumin-a Chhung Inkhawm hmasa ber General Hqrs. Adviser hovin an nei

MNF Serchhip East Block chuan nimin khan Serchhip Venglai-a Mizo Hnam Run-ah kumin atana Chhung Inkhawm hmasa ber neiin MNF General Hqrs. Adviser J. Malsawmzuala Vanchhawng chuan MNF Party mipuite chu thuhnuai rawlh tak chunga politics-a a tha zawnga danglamna thlentu ni tura inbuatsaih turin a chah.

Serchhip Mizo Hnam Run-a MNF Party Chhung Inkhawm ah hian MNF General Hqrs. Adviser leh MNF Publicity Board Vice Chairman J. Malsawmzuala Vanchhawng chuan Serchhip bial mipuite rawngbawl hna thawk tura politics-a zuanglut a nih thu sawiin, politics chu sum leh pai leh hausakna um vang emaw, thuneihna chan hrim hrim duh vang emaw a luhchilh a ni lo tih a sawi a, eng hmanrua pawh a hmangtu in a hman that chuan a tangkai a, Politics pawh mahni mihringpuite rawngbawlna hmanraw pawimawh ber pakhat a nih avangin a hmangthatu nih a tum tih sawiin, MNF party mipuite chu thuhnuai rawlh tak chunga politics-a a tha zawnga danglamna thlentu ni tura inbuatsaih turin a chah a ni.

Serchhip bial vil tura MNF party in an ruat J. Malsawmzuala Vanchhawng chuan kumin kum tawpa Assembly inthlanpui hmachhawn turah bial mipuite rawngbawl hna thawk tur leh ram hmasawnna hna thawk turin a inpumpek dawn tih mai loh chu, mihring lamah chhuan tur engmah a nei lo tih sawiin, Party dang Candidate ten an neih sa sum leh pai leh hmingthanna te, mipuite awih zawng taka thusawi thiamnate chu nei ve lo mah se, MNF changvawn Sam 20:7 ‘Thenkhatin tawlailirte an ring a, thenkhatten Sakawrte an ring a. Keini erawh chuan Lalpa kan Pathian hming chu kan lam zawk ang’ tih chu a innghahna a ni tih a sawi bawk.

MNF sawrkar dinglai chu a vanduai hle tih pawh MNF Adviser J. Malsawmzuala chuan sawiin, Sawrkar lakluh hlimah Lok Sabha inthlanna leh Aizawl West-I Assembly By Election buatsaih a nih avangin Model Code of Conduct in hun engemawchen a phuar nghal a, Sawrkar a insangmar chho dawn chauh tihin COVID-19 hripuiin khawvel leh Mizoram a nuai chhunzawm a, hripui leng hian ni 937 awhin, chu chu kum 2 leh a chanve aia rei a nih thu a sawi bawk. Mizorama rawn raltlante tanpui kawngah sawrkarin tha leh zung leh sum leh pai tam tak a sengral tih pawh sawiin, Zofate Inpui-a himna zawnga lo tlanlutte chu MNF sawrkar chuan a theih ang angin chhawmdawl hna a thawk zel a ni, a ti bawk.

MNF Ministry dinglai kum 4 pumhlum zan tawhah pawh Minister te leh MLA te zingah eirukna leh hlemhletna thila hmingchhia an la awm lo tih J. Malsawmzuala chuan sawiin, an party President, Chief Minister Zoramthanga chungah tuanin finfiahna awm lovin, rin thu leh zeldin thu hmangin eptu party ten nasa taka beiin, mipui rilru a ni lo zawnga hruai kawi an tum niin a sawi a. Sawrkarin harsatna leh buaina tam tak a hmachhawnte chu Zoram mipuiten an theihnghilh a rin loh thu sawiin, hun harsa ber, hripui leng leh buaina dang tam tak Zoram in a hmachhawn laia mipuite ei leh bar leh nitin khawsak mamawha harsa lutuk lova paltlang-puitu CM Zoramthanga kaihhruai sawrkar chu kumin kum tawpa Assembly inthlanpui neih turah mipuite kaltlangin Pathian in hun tha zawk a pek chhunzawm leh ngei a rinawm a ni, a ti bawk.

Kumin atana MNF East Block Ser-chhip Chhung Inkhawm hmasa ber hi Block Adviser LP. Lalsanglura chuan kaihruaiin an President H. Lalthianghlima leh Vice President C. Vanlalsiamthara te pawhin thu an sawi bawk.