Khaw pathum chawmna tura tuilakna hawng

NABARD (RIDF-XXIV) sum cheng nuai 528.92 hmanga Chalfilh Catchment Area khaw pathum te tana tui lakna chu nimin khan Rural Development Minister Lalruatkima chuan Khanpui-ah a hawng.

    Khanpui Bazar Shed-a ‘Springshed Development & Water Supply for Chalfilh Catchment Area’ hawnna hunah RD Minister chuan Mizote chu pi leh pute chenah tuikang nghak thin kan ni tih sawiin, chutiang hun hrehawm leh harsatna te chu hmasawnna in a her liampui tawh tih a sawi a. Ram in hma a sawn rualin kan chenna leilung leh boruak in chhiat lam a pan a, tuihna te a lo tlem tial tial thung a. Kan ramngaw te leh tuihna te siam thar leh turin khawvel ram lian te leh India sawrkar ngei pawhin nasa takin hma a la tih sawiin, heng avang hian kan thing leh mau ti chereu lo zawnga theihtawp chhhuah hi kan tih makmawh a ni, a ti.

RD Minister chuan Van ruahtui dawn khawl nachang hriat a pawimawh thu leh heng tuilakna leh dawn khawlna atana sawrkar hmalakna te mipuiin neitu rilru pu-a duat taka an enkawl thiam a pawimawh thu pawh sawiin, “Tui kan hnianghnar chuan faina leh thianghlimna kawngah te, hriselna kawngah te nasa takin hma kan sawn thei dawn a. Sawrkarin mipuite hnena tui thianghlim pek hi a mawhphurhna a ni a, chumi rualin tui lakna hmunhma leh hmanrua te engtik lai pawhin sawrkarin a vil reng thei lova, a khaw neitu mipui ten hemi kawngah hian mawh an phur a ni,” a ti bawk.

Springshed Development & Water Supply for Chalfilh Catchment Area project hi kum 2017 khan NABARD-ah thehluh a ni a, kum 3 hnu kum 2020 khan NABARD in pawmpuiin Feb. 2, 2020-ah thawh tan a ni a, Oct. 16, 2021-ah zawhfel a ni. He project hi tui lakna tur ngawr ngawr tinzawna duan ni lovin Chalfilh tlang leh a chhehvel ramngaw chereu zel tur veng a, tuihna tuaithar leh tihpun lehna tur atana ruahman a ni a. Chalfilh Catchment Area chhunga khaw 3 - Hmunnghak, Lailak leh Khanpui khua te chawmna turin Chalfilh tlang sang atangin GI Pipe hmanga tui lak a ni a. Tui litre 6000 dawng theuh Zonal Tank 10, Khanpui-ah 5, Lailak-ah 3 leh Hmunnghak-ah 2 dah a ni a. Tui khawlna tur zem lian litre nuai 3 dawng theuh, Khanpui-ah 2 leh Lailak leh Hmunnghak-ah pakhat ve v bakah Lailakah litre nuai 2 dawng pakhat dah a ni bawk.

Nimin-a Springshed Development & Water Supply for Chalfilh Catchment Area project hawnna ah hian Project enkawl zui zel tura din, Project Managing Committee Chairman Benjamin Zalawma BDO Phullen hnenah Project hi a hlan nghal a ni.