Serchhip DCSO hnuaia mi sing nga chuang ten kumin chhung a thlawnin buhfai la thei dawn
Sawrkar laipui in National Food Security Act, 2013, Section 3 hnuaia beneficiary-te tan a thlawna kumin chhung Ration buhfai sem tura a tih chu Serchhip DCSO Office pawhin hma la nghalin tunah hian January thla atan Ration buhfai pekchhuah kim thawkhat a ni tawh a, Retailer hrang hrang ten mipuite hnenah aa thlawnin Ration buhfai hi an sem tan mek a ni. Serchhip DCSO Office atanga thu kan dawn danin Serchhip DCSO hnuaiah hian AAY Ration Card nei 1955 awmin mihring 5171 an awm a, PHH Ration Card nei 10,381 awm bawkin mihring 46,310 an ni bawk a, heng mite hnenah hian kumin chhung zawng Ration buhfai hi a thlawna sem tura ruahman niin Serchhip DCSO hnuaia Ration Card nei 12,333 ah mi 51,481 te chuan a thlawnin buhfai hi an dawng thei dawn a ni.
Serchhip DCSO Office-a thawktute chuan AAY chhungkaw tan thla khat ah Ration buhfai Ration Card pakhat zelah kg. 35 zel a thlawna pek a nih dawn thu sawiin, PHH te tan mihring pakhat ah kg. 5 zel a thlawna pek tur a nih thu an sawi a, PHH chhungkua ten a hmaa buhfai an dawn belh thin, mi pakhat ah kg. 3 zel kg. ah Rs. 15/- hisap-a pek thin erawh pek zui a nih tawh dawn rih loh thu an sawi a. Hei bakah hian APL Card (Card var) nei te chuan a hmaa Retailer atanga buhfai an lei thin anga an lei dawn thu leh mi pakhat tan kg. ah Rs. 15/- zelin kg. 8 an lei thin thu an sawi a, tunah hian Serchhip DCSO hnuaiah APL Card nei 6994 awmin mihring 29,504 an awm thu an sawi bawk a ni.
Serchhip DCSO Office-a thawktute chuan tun dinhmunah Serchhip District-ah buhfai dahkhawl sa dinhmun a tha tawk tih sawiin, January thla Ration pekchhuah fel thawkhat a nih hnuah Serchhip-a Supply Kudam-ah buhfai quintal 4759 a la awm thu an sawi a. AAY Ration Card nei te hnena Ration Chini sem pawh kalpui zui zel niin December thla thleng atan sem a nih tawh thu an sawi a. Ration Chini hi thla thum (3) atan zel pekchhuah a nih thu leh March thla khian pekchhuah leh tur a nih dawn thu an sawi a ni.
Comments
Post a Comment