Road Safety Week 2023 hawnna leh Transport Department-a thawktute inhlantharna neih a ni

Road Safety Week 2023 hawnna leh Transport Department-a thawktute kumina an hnathawhna leh hmalak zelna atana inhlantharna chu nimin khan Aizawl-a Vanapa Hall-ah neih niin he hun hi Transport Minister TJ. Lalnuntluanga chuan a hmanpui a ni.

Nimin-a he hun hmanna ah hian Transport Minister chuan mipui rawngbawltu Department an nih anga tan la thar leh turin Transport Department a thawktute chu a sawm a, “Dan hnuaia awm kan ni tih inhrerengin Department hmalakna tura ruahman chhawpchhuah te dan in a phal chinah hma kan la zel ang a, theihtawp kan chhuah ang,” tiin Dan zawmtute tan dan thar thenkhat te chu a hlauhawmloh thu a sawi a, “Kan intuaitharna hunah hian kan thinlung leh ngaihtuahna hi siamtharin awm se, kan hna kan thawh hian ram hmasawnna atana thawk kan ni tih inhre nawn leh ila, chu hmasawnna tur atan mimal tin kan pawimawh a ni,” a ti.

Minister chuan Transport Department a thawkte chu Social Media zalenna hman thiam leh hmang that kawngah an fakawm thu a sawi a, sawrkar hnathawkte chuan an tih tur a tih mai hian ram rawng an bawl a ni tih in hrerengin rorelna tha, Good governance thlen theihnana pawimawh ber pakhat a nih thu a sawi a. Thawktute chu an taksa hrisel bakah ngaihtuahna hrisel, rilru hrisel neia sawrkar hna thawk a, chutiang nei tur pawh a tan la sauh sauh turin a ngen bawk.

Transport Minister TJ. Lalnuntluanga chuan kum 2023 Road Safety Week denchhen hian lamlian-a chetsualna laka kan him theihnan leh chetsuala hrang hrang kan pumpelh tlan theihnan dan in a phalloh, rui chunga motor khalh lo turin leh Traffic Rules leh Regulation te tha taka zawm a, motor hlui hralh/tihral dawn a motor in tawhsual a tawh palh a kan buai loh nan hmingthlak (ownership transfer) ti ngei thin turin mipuite a chah bawk a ni.

He hunah hian Lalrinawma Joint Director chuan Road Safety Week chungchang sawiin, Er. R. Lalrammawia, Director chuan an Department hmalakna a tarlang a, nikum December 31 thleng khan Driving License pekchhuah 47,1095 leh lirthei Register 27,8144 a awm a ni.