India ram chin-a bomb thlak an dem thu sawi

Tuipuiral Group YMA chuan an Group huamchhung, India ram leilung ngeia Myanmar Indo thlawhna in January ni 10, 2023 chawhnu dar 3:33 vela bomb a thlak chu an dem thu an tarlang.

Nimin-a thuchhuah an siamah Tuipuiral YMA Group chuan he Bomb thlak hi Chin National Front (CNF) hmunpui Camp Victoria-a an bomb thlak lai a thleng nia tarlangin, Myanmar Indo thlawhna in an thlak Bomb hi India ram chhunga a tlak bakah India rama India khua leh tui te motor a tihmelhem tel bawk tih an tarlang a. Myanmar Sipai indo thlawhna te thla hnih kalta vel atanga Tuipuiral huamchhung, India ram chunga an thlawk fo chu an dem takzet tih pawh tarlangin, India ram palzuta indo thlawhna hmanga ramri hrul mipui, loneitu leh Tiau balu la a eizawngte an rum thaih fo chuan India leh Myanmar ramri hrula lonei-a eizawng leh hna hrang hrang thawkte hna thawk thei lovin a siam niin an sawi bawk.

Hetihlai hian niminpiah tlai khan Myanmar sipai Indo thlawhna ten Camp Victoria chhungah Bomb vawi hnih an rawn thlak nawn leh a, hemi vanga thi leh hliam report dawn a ni lo a, In erawh a bomb chhe nual ni a thudawn a ni.