Rajya Sabha MP in Defence Secretary-ah thlen

Mizoram Rajya Sabha MP K.Vanlalvena chuan Border Road Organisation (BRO) hotu thenkhat te lakah Disciplinary Action lak tul a tih thu Union Defence Secretary Giridhar Aramane IAS hnenah a thlen.

Rajya Sabha MP K. Vanlalvena hian niminpiah khan Union Defence Secretary hnenah hian hemi chungchang hi thlenin, kum 2020-ah Ministry of DoNER in NEC kaltlangin Mizoram chhimchhak lam leh Chin Hills Capital inkalpawhna tur Sangau to Saisihchhuah Double lane road laihna tur sanction cheng vbc. 66 (Rs. 66 crores) a sanction thu leh he hna thawk tur hian BRO chu DoNER hian a thlang tih a tarlang a.

Chin Hills khawpui Hakha atangin Saisihchhuah hi China puihna in Myanmar sawrkar chuan kum thum kalta khan double lane kawng a rawn lai tlang daih tawh a. Kawng laihna atana pawisa sanction a nih hnu kum hnih aia rei liam hnu ah pawh BRO hian metre khat leka thui pawh kawng an la laih loh avangin sanction hi withdraw leh tura ruahman mek a ni a. Mizoram mipuite hmasawnna ngaihthahna leh ram leh hnam himna (National Security) ngaih pawimawh lohna lian tak a nih avangin he thila mawhphurtu BRO hotute chungah action lak chu tih makmawh nia a hriat thu a tarlang bawk a ni.

Mizoram Rajya Sabha MP chuan Champhai - Siaha Defence Road thui tak laih tawh leh hun leh sum tam tak senral tawhna ni si, Thingsai leh Pangkhua inkar kawng laih tur thawk duh lova kum tam tak hna an chawlh tawh hnuah an tawpsan ringawt avang te hian BRO hotute hian tribal mipuite hmasawnna an ngai pawimawh lovin ram leh hnam himna an ngaihthah tih a lang chiang nia tarlangin, Disciplinary Action hi a rang thei ang bera lak chu thil tih mâkmawh a ni tiin Defence Ministry chu BRO te chunga action la turin a ngen a ni.