Mizoram Budget puitling House-ah pharh dawn

Thla thar February ni 7 atanga tan tur, Assembly inkhawmah Finance changtu Chief Minister Zoramthanga’n kum 2023-2024 Mizo-ram Budget puitling a pharh dawn.

    Finance Department hotute sawi danin Budget puitling pharh tur hian an inbuatsaih mek a, eptu lamin inthlan kuma Budget puitling pharh an sawisel deuh thin leh Budget lailawk (Interim Budget) pharh zawk se an tih thin chungchangah Finance Department hotute chuan tunlai-ah chuan thil a danglam tawh niin an sawi a. Planning Commission awm lai, Mizoram Plan sum zat tur hriat lawk loh ang kha a ni tawh lo tih an sawi a. Tunah hi chuan sum hmuh tur tlangpui a hriat vek tawh avangin Budget puitling siam hi a awlsam tawh a, a lang tlang em em a, zep theih pawh a awm lo niin an sawi a ni.

Thla thar ni 7 atanga tan tur Assembly inkhawm hun hman dan tur hi Assembly Speaker kaihhruai, Business Advisory Committee (BAC) in a la duan tur a ni a. BAC an la thutkhawm loh avangin Budget pharh ni tur hi a la hriat theih loh a. Tun tum Assembly inkhawmah hian Deputy Speaker hmun ruak hnawhkhat turin a thar thlan a ni dawn em tih pawh a la chiang chiah lo a ni.

Hriat chian theih chin chu kum khata Assembly Inkhawm hmasa ber tur a nih avangin Larsap Dr. Hari Babu Kambhampati chuan kalphung awmsa angin inkhawm tan ni-ah Assembly chhungah thu a sawi anga. Budget Session a nih bawk avangin Mizoram Budget pharh a ni ang. Budget a tlangpui a sawihona ni 2 chhung neih a ni ang a, chumi hnu-ah Minister-te hna chanpual theuha sum ruahman chu a tahtawl a sawi chhoh a pawm chhoh zel tura ruahman a ni ang.