Myanmar indo thlawhna te’n Mizoram-ah Bomb an thlak tih finfiahna a awm lo

Myanmar indo thlawhna te’n an ramchhunga CNA hmunpui Camp Victoria an bomb pahin Mizoram chhungah bomb an thlak ve tih finfiahna chiah a awm lo niin Champhai District Bawrhsap-in a sawi.

    Champhai District Bawrhsap James Lalrinchhana’n Home Department-a report a thehluh hi Khawbung BDO-in a hmuna a enfiahna report behchhan a ni a, Farkawn atanga KM 10 vela awm, Tiau lui atanga meter 10 vela awm, Camp Victoria hi kar kalta Thawhlehni leh Nilaini tlai khan Myanmar indo thlawhna te hian an Bomb tih a sawi a. Thawhlehni-ah Bomb 5 an thlak a, Nilaini-ah Bomb 3 thlakin Thawhlehni hian Bomb emaw, a siper emaw chu Tiau lui-ah a tla ngei a, chumi nghawr ah chuan a bulhnai a awm, Tiau lui a balu la mek, Truck pakhat registration No. MZ-01-J/6847 chu a darthlalang a nghawr chhe nual a ni.

Tiau lui hi India leh Myanmar inrina lai taka awm a nih avangin Mizoram (India) leilungah a tla tih fiahna chat a awm lo niin a sawi a, Tiau lui a bomb tla siper hi Mizoram chhung lam metre 20 velah hmuh tur chu a awm a ni. Nilaini-ah hian bomb 3 an thlak a, chu chu Camp Victoria chhungah a tla a, Mizoram (India) ram chhungah nghawng a nei lo niin report chuan a tarlang bawk.

Myanmar ramri vengtu Assam Rifles lam chuan Myanmar indo thlawhna bomb thlak hi India ram chhungah a tla lo niin report an lo pe tawh a ni.

Hetihlai hian kar kaltaa Myanmar sipai indo thlawhnate’n Mizoram leh Myanmar inrina a awm Camp Victoria chu bomb hmanga an beih avangin Myanmar Chin State atangin Mizoram-ah raltlan an lo luh belh thung a. Tuipuiral Group YMA President MC. Lalramenga sawi danin Zirtawpni khan chhungkaw 44-a mi 197-te chu Mizoram-ah rawn lutin Farkawn khawtlangin an lo buaipui a, Inrinni zan khan Khankawn khuaah chhungkaw 2 ami mi 10 an lo lut a, Tlangpui leh Lunglerh khuaah mi 5 ve ve an lut bawk a ni. Farkawn Village Level Committee on Myanmar Refugees chuan raltlan lo lut apiang inhriattir turin thu an chhuah bawk a ni.

Tun dinhmunah Mizoram chhungah Myanmar atanga raltlan lo lut mi 30,000 vel an awm mek a, Zokhawthar ep, Khawmawi, Haimual leh Rihkhawdar vela cheng, mipui sipai pawl leh Myanmar sipai inkahna avanga raltlante bakah hmun hrang hranga awmte hi an ram-a kir leh an awm nual avangin raltlan zat hi a danglam deuh reng a ni. Raltlan zinga 20 aia tlem lo hi kum 2020 Myanmar inthlanpui a dan siamtu pawl-a thlantlinte an ni.