Session thar ah School Uniform inang hmang dawn

Mizoram sawrkar in a lo ruahman tawh angin Academic Session thar, 2023-24 atangin Mizoram sawrkar hnuaia sikul zirlaiten Uniform inang tlang (Common School Uniform) an hman tur chu kaltlangpui a ni dawn a, School Uniform supply leh sem chungchangah sawrkar leh Department lam an inrawlh dawn lo nia thudawn a ni.

    School Education Director Dr. H. Lalthlangliana chuan 2023-24 Academic Session atanga School Uniform inang tlang hman tur chu ruahmanna lo awm tawh sa angin kaltlangpui tur a ni dawn tih a sawi a, ruahmanna lo awm tawh sa chu belh emaw, paih emaw awm loin kalpui a ni dawn tih a sawi. Aizawl District Education Officer-in thupek (order) a tichhuaha tarlan a nih tawh danin Common School Uniform hi sawrkar sikul (Government School) te bakah, Adhoc Aided Sikul (sawrkar puihna dawng sikul)-te pawh hmang tura tih an ni a. Uniform-te chu sikul in an buaipui tur a nih thu leh Uniform supply leh sem chungchangah sawrkar leh Department a inrawlh dawn loh thu tarlan a ni.

Sawrkar School a zirlaite Uniform chu Primary School, Middle School, High School leh Higher Secondary School-ah Kekawr tlawn leh pawnfen rawng a inang dawn lo a, kawr (kamis) var leh pheikhawk dum vek tur a ni thung anga. Primary School-ah Kekawr/Pawnfen Dumpawl leh Middle School-ah Vutbuak rawng niin Kamis var ban bul a ni anga. High School leh Higher Secondary School-ah Kekawr/Pawnfen dum niin Kamir-ah a var ban tlawn a ni thung ang. School T-Shirt, Bag, Badge, Necktie, Kawrlum, Kawnghren leh Mawza te chu sikul mal duh thlan ang hman theih a ni ang.