Laldenga Synthetic Turf Football Ground hawng

Mamit District chhung Tuidam khua ah nimin khan Chief Minister Zoramthanga chuan ‘Laldenga Synthetic Turf Football Ground’ a hawng.

PMJVK Scheme atanga sum hmuh hmanga Laldenga Synthetic Turf Football Ground siam hawnna ah hian Chief Minister chuan khawthlang lamah development a kal mek a, a kal zel dawn tih sawiin, Football Ground hawn tak chu thalai ten tumruhna nen tangkai taka hmang turin a chah a. Hnam Pa Pu Laldenga hming chawia Tuidam-a Football Ground a awm chu lawm-awm a tih thu sawiin, India ram mi ngei te zinga Mizoram awmna hrelo an la tamnaah hian hnam thinlung put pawimawh a tih thu a sawi bawk.

Laldenga Astro Turf Football Ground siamna atan hian kum 2019-2020 khan PMJVK Scheme atangin cheng nuai 532.50 hmuh a ni a, Creative Minds, Chanmari West, Aizawl in a siam hna hi thawkin Football Ground-ah Synthetic Football Turf phah niin Gallery pahnih, mi 100 vel thut theihna siam a ni a, Pavilion awmsa chu cheithaa tihlen ni bawkin Dressing Room pathum leh a hungna siam a ni bawk.

Chief Minister hian nimin vek khan Kawrthah khua ah PMJVK Scheme atanga sum hmuh hmanga Synthetic Turf Football Ground siam leh MSSC-TATA Trusts Football Academy, Kawrthah Centre chu a hawng nghal bawk a, Synthetic Turf Football Ground siam hna hi M/S Décor India, GS Road, Guwahati ten thawkin mi 100 vel thut theihna tur RCC Gallery leh Pavillion chhawng hnih siam niin Dressing Room pahnih a awm a, a hungna tha tak siam a ni bawk. MSSC-TATA Trusts Football Academy hi Mizoram hmun hrang hranga Centre 60 din tur zinga mi niin tun dinhmunah Centre zawng zawng ah trainees 1800 vel an awm mek a ni.