I&PR Minister in AIR Aizawl-ah nitin-a tihchhuah tur Midday News Bulletin aa tlangzarh

All India Radio (AIR) Aizawl in nitin chawhnu dar 2:30-a a tihchhuah tur, Midday News Bulletin chu nimin khan I&PR Minister Lalruatkima chuan AIR Aizawl-ah a tlangzarh.

AIR Midday News Bulletin tlangzarhna hunah hian I&PR Minister chuan All India Radio chu khawvel pum huap pawha Radio Network lian ber an nih thu sawiin, tawng hrang hranga thupuang darh tam ber an ni tih a sawi a. Tun dinhmunah hian India ram 92% tuamchhuak tawhin kan ram population atanga za zela 99.19 hnen an thleng tawh tih a sawi. I&PR Minister chuan All India Radio Aizawl Station chu July ni 31, 1966 khan din niin 150 Watt Transmitter hmangin bul tan a nih thu pawh sawiin, kum 1966 chho velah phei chuan Radio chu mipuite thleng phak huapzau ber niin, mipuiin an tangkaipui hle tih a sawi a, chanchin thar thehdarh piah lamah zai leh hla thlan programme te khan mipui a awi hneh tih sawiin, “Khang hunlai atang khan AIR Aizawl hian nasa takin mipui tan rawng an lo bawl tawh thin a ni,” a ti.

I&PR Minister Lalruatkima chuan Social Media khawvelah kan awm tawh thu leh thuthang chhiar tur leh hriattur awm reng karah thubelhchian dawl lo tam takin a lo pawlh ve reng bawk tih sawiin, “Amaherawhchu mipui ten thu chiang an lakna ber chu kan chanchinthar puangtu te, AIR News, Doordarshan News te hi a la ni reng a ni,” a ti a. All India Radio Aizawl in Midday News Bulletin hmanga thu belhchian dawl kan hre zung zung thei tur chu a lawmawm takzet tih sawiin, mipui ten nasa taka an tangkaipui a, hmalam pan zel tura a duhsak thu a sawi a. All India Radio Aizawl in programme a tihchhuah te chu Mizoram mipuite bakah State danga Mizo awmte leh Bangladesh leh Myanmar rama zohnahthlak ten an hlawkpuiin an tangkaipui hle tih pawh sawiin, “Social Media kan hman uar tak hnuah pawh hian Mizo mipuite rilru leh thinlungah radio in hmun a luah thuk hle a ni,” a ti bawk.

Midday News Bulletin hi Live Streaming Prasarbharati Apps, FM, MW channel-ah leh Satellite mode-in DTH-ah pekchhuah a ni anga. Mizoram-a AIR FM Station zawng zawng Lunglei, Siaha, Taiping, Champhai leh Kolasib ten an Relay vek dawn bawk a ni.