Bank lam ten an thawhrim avangin tunhnaiah hma an sawn hle - Governor
Governor Hari Babu Kambhampati chuan tunhnaiah Bank lam ten an thawhrim avangin hma an sawn hle tih sawiin, Bank hnathawkte chu an hunawlah khawlai fang kuala Hawker te, Dawrte nghak te leh chawhmeh zuar te tlawh kual a, Bank atanga an sumdawnna pui tura pawisa an puk theih chungchang te hrilhfiah turin a chah.
Governor Hari Babu Kambhampati hian nimin khan a chenna Raj Bhavan-ah State Bank of India (SBI) leh Regional Rural Banks (RRB) hotute kawmin Bank te hmalakna chungchang hi a sawipui a. Governor hian SBI Corporate Center, Mumbai-a General Manager (RRB) V. Siva Kumar leh Mizoram Rural Bank Chairman Jaya Chandra te kawm hmasa in Mizoram Rural Bank hmalakna hrang hrang leh an hmasawnna te a ngaithla a, hemi hnu hian SBI-a Regional Manager Rakesh Kumar Ravi kawm lehin SBI in hma a lak mek dan leh Mizoram chhunga an hmachhawp te a ngaithlak bawk a ni.
Heng Bank hotute a kawmna ah hian Governor chuan tunhnaiah Bank lam ten an thawhrim avangin hma an sawn hle tih tih sawiin, tan lak chhunzawm zel erawh a ngai tih a sawi a. Central Sawrkar hnuaia Scheme tha tak tak atanga tanpuina te customer leh beneficiary ten an hmuh theihna turin heng Scheme-ah te inziaklut thar an pung sawt tih SLBC report atangin a lo hmuh thu leh lawmawm a tih thu a sawi a. Sumdawng tenau zawk – dawrte neia khawlaia thu, chawhmeh zuar leh a dang ten loan an lak theih na tura tanlak erawh a ngai tih sawiin, Bank hnathawkte chu an hunawlah khawlai fang kuala Hawker te, dawrte nghak te leh chawhmeh zuar te tlawhkual a, Bank atanga an sumdawnna pui tura pawisa an puk theih chungchang te hrilhfiah turin a chah a. “Sumdawnna tenau zawk hmanga eizawng te hian hma an sawn zel a, an sumdawnna te an tihlen theih nan Mudra Shishu Loan (Rs 50,000 thleng) leh Mudra Kishor Loan (Rs 50,000/- atanga cheng nuai 10 thleng) an puk theih thu te an hriatchian a ngai a ni,” a ti. Governor chuan Bank hnathawk te chu Pradhan Mantri Jan Dhan Yojana (PMJDY), Pradhan Mantri Jeevan Jyoti Bima Yojana (PMJJBY), Pradhan Mantri Suraksha Bima Yojana (PMSBY) leh Scheme dang ah beneficiary tam zawk ziaklut tura tan la chhunzawm turin a chah bawk.
He inkawmna ah hian V. Siva Kumar, General Manager (RRB), SBI Corporate Center, Mumbai leh Jaya Chandra, Chairman, Mizoram Rural Bank chuan Governor hnenah hian Mizoram Rural Bank in Internet Banking Facility chu niminpiah atangin a nei thar tih an sawi a. MRB hotute sawi dan chuan MRB chu India hmarchhak bial-ah Internet Banking Facility nei hmasa ber an ni a. Tunah chuan Mizoram chhunga MRB Bank Branch leh Customer Service Point 500-ah Internet Banking a tih theih dawn a ni.
MRB Branch hawn belh tum a ni tih pawh he hunah hian sawiin, hei hian tuna Bank awm tlemna hmun thenkhat, abikin Chawngte leh Siaha bial chhunga bank dawr chungchanga mipuite harsatna pawh engemaw chen a tih ziaawm an rin thu an sawi bawk.
SBI Regional Manager Rakesh Kumar Ravi pawhin he hunah hian SBI hmalakna, hmasawnna thenkhat leh Scheme hrang hranga beneficiary Enrollment tihpun kawnga tanlak chhoh an tum dan te a sawi a. Mamit District chu Aspirational District a nih avanga Bank lama mamawh hrang hranga thuam chak a nih tur thu tarlangin, Mizoram hmun hrang hranga Bank Branch hawn belh tum a nih thu a sawi bawk.