ZPM in sawrkarna an chang a nih chuan Zirtirtu Non-Transferable Post siam dawn - ZPM Leader

Serchhip bialtu MLA leh ZPM Leader Lalduhoma chuan nimin khan Serchhip Bial chhunga Neihloh khua ah Zirtirtu pahnih luah theih tur MLA Fund atanga sak Qurters a hawng a. Sawrkarna an chang anih chuan Zirtirtu Non-Tranferable Post engemaw siam a ni ang tih a sawi.

MLA Fund cheng nuai 6 senga sak Neihloh khuaa Zirtirtu Quarters hawnna hun nimin-a neih ah Serchhip bialtu MLA chuan Education Department hnuaia Zirtirtu, a bikin Thingtlang zawka thawk ten Quarters an nei mumal lo tih sawiin, In luah mai tur a lo awm thin loh avangin hei hi thingtlang zawka Zirtirtute harsatna lian tak a ni tih a sawi a. Zirtirtute Quarters sakna tur chu Budget-ah dah turin an nawr thu leh an sawi fo thin chungin ngaihpawimawh a hlawh tawk lo thin tih a sawi bawk. ZPM Leader ni bawk Lalduhoma chuan, ZPM ten Sawrkarna an chang anih chuan Zirtirtu tan Non-Tranferable Post engemaw zat an siam dawn tih sawiin, chumi hnuaiah chuan a khaw mi ngei, transfer duh ve lo tur lak an ni ang tih a sawi a, chu chuan thingtlang lama zirtirtu leh zirlaite harsatna tawh thin a siamthat ngei an beisei thu a sawi a. Tuna hawn tak Quarters sak hna thawktu (Work Agency) ten thahnem ngai taka an lo thawk chu lawmawm a tih thu a sawi bawk.

Neihloh khuaa Zirtirtu Quarters sak thar hawnna hun hi ZPM Neihloh Unit President C. Lalduhawma chuan kaihruaiin Neihloh VCP Pianmawia leh Neihloh Branch YMA President Hranghmingthanga te pawhin thu an sawi a. Neihloh khuaa Zirtirtu Quarters sakna atan hian Serchhip bialtu MLA hian MLA Fund atangin cheng nuai 6 a pe a, he sum hmang hian Govt. Middle School hmunah Assam Type in Zirtirtu Quarters tur hi a dung ft. 38 leh a vang ft. 25-a lian in sak a ni a, he In sak thar hi Chhungkaw pahnih te luah theih tura ruahman niin hawn a nih hnu hian luah nghal a ni dawn a ni.

Serchhip Bialtu MLA hian nimin tlai khan Thenzawl-a Futsal Tournament buatsaih chu hawngin nizan khan Party Inkhawm neih a hmanpui nghal a. Thenzawl-ah hian zan riakin Vawiin hian Tlawng lui-a Nul nei ten an thlai phurhna atana an hmann turin Lawngleng a pe dawn a, hemi hnu hian Serchhip-ah rawn chho lehin tlai lamah Aizawl a pan nghal dawn a ni.

Comments

Popular posts from this blog