Bangladesh atanga raltlan Mizoram-ah luh belhin MSU in Zohnahthlak tan an inhawng reng tih an sawi

Bangladesh atanga raltlan mi engemaw zat ramhnuaia awm zinga mi 15 te chu nimin khan Mizoram-ah MSU Vice President Laldinsanga hovin Parva-III khawtlang mipuite chuan Tuichawng Group YMA leh Damdep-II khawtlang hruaitute nen an lo dawngsawng a. MSU chuan Zohnahthlak te tan an inhawng reng dawn tih an sawi bawk.

Hemi chungchanga MSU thuchhuahin a tarlan danin raltlan lo lut thar te hi ramhnuai ah ni engemaw zat chaw nghei tawh an nih avangin an taksa a chau hle a, an hriselna dinhmun enfiah nghal niin a hmaa an ruala lokal mi 90 bawr vel erawh BSF duty ten kutthlakin, an ei leh in neihchhun te an tih chingpensak a, riltam a thih tawp ai chuan tiin ei tur an hmuhna tur ngaihtuahin Bangladesh lam an pan leh ta niin an sawi a. An letna lamah pitar pakhat erawh kal kawngah a boral tih thu MSU chuan a dawng a, Zofate himna zawnga lo luh tum te, BSF ten ramhnuaia boral tura an lo let tir leh hi MSU chuan na a tiin BSF duty te a dem takzet a, he thil thleng hi a en liam mai mai dawn lo tih an tarlang bawk a. Raltlan lo lut thar te hi Parva-III khuaa sawrkar Official awm te hnenah hriattirin, sawrkar kuta an him chhunzawm zel an beisei tih an sawi bawk.

MSU chuan Bangladesh ram buai avanga Zohnahthlakte ramhnuaia chawnghei leh thlabar taka awm mek hi mi 800 chuang zet an la ni nia hriat a nih thu tarlangin, himna zawnga Zofate Inpui pana Zohnahthlak lo raltlan mekte hi Mizo-ram an luh ngei theihna kawnga harsatna awm zawng zawng sukiang thuai turin Mizoram sawrkar an ngen nawn leh tih an thuchhuah chuan a tarlang bawk a ni.

Parva-III khuaah hian raltlan mi 310 an awm mek tih pawh MSU chuan sawiin, Mizo-ram Sawrkar chuan raltlan lo lutte himna leh riltama an awm loh nan theihtawp a chhuah mek zel avangin lawmawm an tih thu an sawi a. Bangladesh atanga raltlante tan MSU chuan theihtawp a chhuah zel dawn tih pawh sawiin, “Engtik hunah pawh Zohnahthlakte tan MSU chu a inhawng reng dawn a ni,” an ti bawk.