Tlawng lui humhalh chungchang sawihona nei

Nimin khan Tlawng lui humhalh chungchang sawihona chu Mizoram State Planning Board Vice Chairman H. Rammawi kaihhruaiin Planning & Programme Implementation Committee Room-ah neih a ni.

He sawihona hunah hian H. Rammawi chuan Tlawng lui chu Mizorama lui hmingthang leh tangkai tak a nih mek laiin kan tibawlhhlawh nasa tawh hle tih sawiin, lui-a cheng nungchate mai bakah a bulhnaia cheng mihringte ngei pawhin kan tuar mek tih a sawi a, Tlawng vawngfai a, ti thianghlim tur hian sawrkar department hrang hrangte thawh-hohna tha a pawimawh rualin mipuiten mawh-phurhna nasa tak an nei a, bawlhlawh sawngbawl leh paih danah pawh fimkhur tlan a ngai hle tih a sawi bawk.

State Planning Board Vice Chairman chuan khawvel pumah tui thianghlim a vang mek zel a, chuvangin nunphung thlak a, faina leh thianghlimna kawng zawh thuai a nih loh chuan tun aia nasa zawkin kan tuar thei dawn a ni, a ti a. Mipuite chu bawlhlawh tawih thei leh thei lo, plastic thliar kawngah leh leivung paih kawngah fimkhur lehzual turin a sawm nghal bawk.

He hunah hian ‘Conservation of Tlawng River and its tributaries through catchment area treatment or protection of its tributaries’ tih thupui hmanga Land Resources, Soil and Water Conservation Department Project buatsaih chu sawiho a ni a. He Project hnuaiah hian Tlawng lui vawn thianghlimna tur kawng hrang hrangte tarlan leh zirho a ni a. He project atan hian cheng vbc. 4.27 vel beisei niin Funding hi North East Special Infrastructure Development Scheme (NESIDS) kaltlanga hmuh beisei a ni a, Planning and Programme Implementation Department ten an buaipui dawn a ni.