Rajya Sabha MP in Kuhva chungchang House-ah sawi

Mizoram Rajya Sabha MP K. Vanlalvena chuan Parliament thutkhawm neih mekah nimin khan Mizoram leh Tripura-a loneitu tam tak kuhva chingtute harsatna thu a auchhuah pui.

Nimin a Rajya Sabha thutkhawm-a Zero hours-ah Mizoram MP K. Vanlalvena hian thu sawiin kum tam tak kal tawh atangin Mizoram leh Tripura tlangmi mipui tam takin kuhva chin hi eizawnna pui bera an hman thin thu a sawi a, heng State pahniha kuhva chingtu te hian van-duaithlak takin kumin chhung hian India ram State dangah te an kuhva tharchhuah an hralh theih loh thu Parliament House-ah hian a sawi a ni.

Mizoram Rajya Sabha MP chuan Mizo-ram leh Tripura loneitute tharchhuah kuhva te chu India sawrkar, Ministry of Home Affairs thupek hmuin Assam sawrkar mi leh sa ten Assam ramchhungah lo tidingin an lo man thin tih a sawi a. Official thenkhatte report-a a lan dan chuan South East Asia ram atanga kuhva ro tam tham tak Myanmar kaltlanga India ram a lo luh thu leh heng hi Central sawrkar chuan tihtawpa lo dan chah a tum niin a hriat thu a sawi a. Ramdang atanga kuhva lo lut tihtawp chu tha a tih thu leh North East mite kuhva tharchhuah erawh India ram khawi hmunah pawh zalen taka hralh chhuah phalsak tur a nih thu te, foreign kuhva leh India ram kuhva chu hriat pawlh loh tur a nih thu leh, Hmarchhak bial hi ram dang ah kan ngai a nih si loh chuan hmarchhak bial atanga kuhva thar te chu zalen taka hralh-chhuah a ni tur a nih thu te a sawi bawk a ni.

Rajya Sabha MP K. Vanlalvena hi tun-hnaiah a kheimit ruh zai a nih avangin Parliament Session-ah hian Wheelchair a thu chungin a tel a ni.