Latest News

SVAMITVA chungchang inzirtirna kalpui mek a ni

Thingtlang-a cheng, Inhmun/ram neitute fel fai taka chhinchhiahna tura Sawrkar hmalakna, Survey of Villages Abadi And Mapping with Improvised Technology in Village Areas (SVAMITVA) chungchang inzirtirna (IEC) chu niminpiah khan Lunglei-ah neih a ni.

Convention Centre, Lunglei-a he zirhona hunah hian Lunglei District Settlement Officer Alan Lalthanzara chuan SVAMITVA chu thingtlanga cheng, Inhmun/ram neitute fel fai taka chhinchhiahna tura Sawrkar hmalakna a ni tih hi sawiin, peihfel a nih hunah chuan ram neitute mai bakah Village Council leh sawrkar department-a thawkte tan hlei hlei a tangkai dawn hle a ni, a ti. VC ten an khaw Map fiah leh dik tak an neih theih dawn avangin khawtlang hmasawnna hnathawh nan te, sawrkar Scheme hrang hrang kalpui dawn te pawhin tangkai takin a hman theih dawn tih a sawi bawk.

SVAMITVA hi Mizoram-a District hrang hrang pakua (Lawngtlai leh Siaha tel lovin)-a khaw 330 ah kalpui tur niin, tun dinhmunah IEC hi khaw 251 ah neih tawh a ni a. Khaw 71-ah Drone hmanga thlalak tawh niin, khaw 10-ah Map siam zawh tawh a ni. Ground verification pawh khaw 10-ah neih tawh a ni bawk.

SVAMITVA chungchang inzirtirna (IEC) hi hmalakna hmasa ber niin, hemi zawhah Ground Control Prints lak a ni anga, khaw hrang hrangah te Drone hmangin uluk taka chenna in awmte thla lak a ni ang a, chung thlalak hmang chuan khawchhung Map siam a ni dawn a ni. Map siam zawh hnuah hian a hmuna zirchianna (Ground Verification) neih leh vek a ni ang a, he hunah hian VC te leh ram neitute nen Gram Sabha neih a ni ang. Ground Truthing/Verification zawhah hian ram neitu diktakte chu LR&S Department atangin Property Card siamsak an ni ang a, hei hi a hmandanah LSC tlukpui a ni dawn a ni.

Comments

Popular News (Last 30 Days)