Latest News

MoS for Housing & Urban Affairs in Lawngtlai tlawh

Union Minister of State for Housing & Urban Affairs Kaushal Kishore chuan nimin khan Lawngtlai tlawhin Lawngtlai-a Sawrkar laipui ruahmanna hnuaia hmasawnna hna thawh hrang hrang (Centrally Sponsored Scheme) hmanga hnathawh hrang hrang thlirhona hun a hmanpui a ni.

Lawngtlai DC Conference Hall-a State sawrkar hnuaia Department hotute nen Review Meeting an neih ah hian Lawngtlai District Bawrhsap Amol Srivastava chuan Lawngtlai District dinhmun tlangpui leh District chhunga sawrkar hmalakna langsar zualte tarlangin, Lawngtlai District-a UD&PA Department hmalakna tarlanna Video thlirho a ni a. Union Minister of State Kaushal Kishore chuan Lawngtlai District hmasawnna atana Department hrang hrangte hmalakna chu fakawm a tih thu sawiin, sawrkarin mipui hamthatna tur ruahmanna tha tak tak a duante mipuiin a nih dan tur taka an chhawr theih nan mahni hma zawn theuhvah thahnem ngai taka thawk zel turin kalkhawmte chu a chah a ni.

Union Minister of State Kaushal Kishore hian nimin khan Helicopter hmanga Lawngtlai hi thlengin Lawngtlai Helipad-ah Lawngtlai Bawrhsap Amol Srivastava IAS hovin District Administration leh Police lam Official-ten an lo dawngsawng a. Hemi hnu hian Lawngtlai DC Conference Hall-ah Lai Autonomous District Council (LADC) hotute nen inkawmna neiin LADC-a Deputy Chief Whip H. Lalmuansanga hovin LADC Official-te'n LADC dinhmun tlangpui an hrilh bakah mamawh an neihte an lo thlen a. Lawngtlai-a Maxi Cab Terminal sakna tur leh Project dang Concept Paper an thehluh chu a theih anga Cabinet Minister hnena a lo bawhzui sak tur thu a sawi a ni.

Union Minister of State hian Central Young Lai Association, Lai Women Association leh Lai Students' Association hruaitute pawh kawmin tlawmngai pawl te chu khawtlang siamthatna kawnga ram innghahna leh sawrkar kutke pawimawh ber pakhat an nih thu a sawi a. Thalaite suat mektu ruihhlo hman khawlohna leh zuk leh hmuam leh zu dona kawnga theihtawp chhuah chhunzawm zel tura chahin, LWA-in HIV positive-te enkawlna hmun dinna tur project an siam te, LSA-in New Delhi-a Students' Hostel sakna tur ram an dilna leh Mizo-ram-a ADC-te dinhmun tha zawk pe tura an ngenna te chu a tul anga lo bawhzui a tum thu a sawi a ni.

Union Minister of State Kaushal Kishore hi UD&PASecretary Lalmalsawma Pachuau, IRS chuan tawiawmin nimin chawhnu lam khan Aizawl lam a pan leh nghal a ni.

Comments

Popular News (Last 30 Days)