Serchhip District Wildlife Crime Control Sub-Unit ten nungcha humhalhna a hmalak dan tur an rel

Serchhip District Wildlife Crime Control Sub-Unit chu nimin khan SP Serchhip Office Chamber-ah thukhawmin nungcha humhalhna tura hmalak dan tur hrang hrang an sawiho.
He thutkhawm Serchhip SP Stephen Lalrinawma kaihhruai a neih ah hian Serchhip District huamchhunga dan lova nungcha kap thinte leh License leh Permit nei lova silai leh Airgun kawlte man chhuah kawngah chak zawka hmalak dan tur ruahmanna siam a ni a. Police leh EF&CC Department staff te bakah YMA te nen nen Joint Patrolling neih a, Bazar leh hmun danga Dan kalha ramsa rep zuar an awm leh awm loh te dapa hetiang tite manchhuah an nih theih nan Checking kalpui ni se an tih bakah nungcha humhalh kawnga inzirtirna a tam thei ang ber neih nise an ti bawk a ni.

Hei bakah hian tunhnaiah Mizoram kaltlanga rampawn atanga nungcha hmanga sumdawnna (Exotic Wildlife Trafficking) hmuh tur awm thin chu pawi an tih thu pawh he hunah hian sawilan niin, Serchhip District mipuite hetiang thil a inhnamhnawih lo turin an ngen a. Wildlife Trafficking man chhuah reng reng chu danin a sawi anga hrem an nih theih nan hmalak thin nise tiin he thutkhawm a tel te hian an rel bawk a. Serchhip Mualvawm rama tunhnaia mi thenkhatten Thang tam tak kama, helai ram-a Vahrit leh Ramar leh nungcha dangte tana harsatna an thlen chu pawi an tih thu pawh an sawi a, hetiang titute hi man an nih theih nan hmalak nise an ti bawk.

Nimin-a Serchhip District Wildlife Crime Control Sub-Unit Meeting-ah hian Serchhip SP Stephen Lalrinawma bakah Member Secretary leh Thenzawl DFO Lalbiakchama Chawngthu, Addl. SP Serchhip; Commandant 42 Bn. Assam Rifles; Dy. Commandant 163 Bn. BSF; DFO N. Vanlaiphai; Officer in Charge (Crime Branch) SP Office, Honorary Wildlife Warden Serchhip District; President Serchhip Sub-Hqrs YMA leh President Serchhip Joint Village Council te an tel a ni.

Comments

Popular posts from this blog