Ramsa humhalh te laka pawikhawihna zirhona nei

Ramsa humhalh te laka pawikhawihna chhui leh hmalak dan chungchang inzirtirna, 'Symposium on Wildlife Crimes' chu nimin khan Aizawl-a Assembly Annex Conference Hall-ah neih a ni.

Mizoram State Legal Services Authority, Mizoram Police, Environmental Forest & Climate Change Department leh Custom Division, Aizawl tangkawp buatsaih 'Symposium on Wildlife Crimes' hi Gauhati High Court atangin Justice Michael Zothankhuma chuan hmanpuiin dan lo a ramsa humhalh te hmundanga tawlh leh hralh an awm fo ta mai chu pawi a tih thu sawiin, nungcha sumdawnna kalpuite hremna leh sawrkar thuneitute pawhin mawhphurhna an neih hrang hrangte he Symposium-ah hian zirchiang turin a chah a. Dan pawimawh tak tak Wildlife (Protection) Act, 1972; Customs Act, 1962; CITES chungchang te bakah Indian Forest Act 1927 te chu a bik taka zirchianga, dan zawm lo te chunga hmalakna te fiah taka hre turin a chah bawk a ni.

He Symposium hun hmasa hi Joel Joseph Denga, Registrar Gauhati High Court, Aizawl Bench chuan kaihruaiin R. Vanlalena, Member Secretary, Mizoram SLSA chuan kalkhawmte lawmna thu a sawi a. PCCF RK. Singh leh Mizoram DGP Devesh Chandra Srivastav te pawhin thu an sawi bakah Justice Marli Vankung pawhin kan ram a tualto flora leh fauna te kan ngaihthlut a pawimawh thu a sawi a, kan chhehvela nungcha rem zelah hian mawhphurhna kan nei a ni tih hre thar leh turin kalkhawm te a chah a ni.