PWD Engineer-in-Chief hlui thiamloh chantir

PWD Engineer-in-Chief hlui Liansanga chu Special Court (Prevention of Corruption Act) chuan eiruk thubuai ah thiamloh a chantir a, a hremna tur chu Vawiin hian puan a ni ang.

Thudawn danin Court-in PWD E-in-C hlui Liansanga thiamloh a chantirna hi Kau-Tlabung Hydel Project leh Tuipang lui Mini Hydel Project siamnaa sum tihchingpen thubuaiah a ni a. Heng Hydel Project pahnih siamna ah hian sum indaih loh chhuanlamin tum engemawzat Revised Estimate siamin Sawrkar-ah sum an dil belh a. Hei hi thil dik lo a nih piah lamah nasa takin hna a khaihlak a, heng Hydel Project pahnih-ah hian kawlphetha siamchhuah hun tura ngaih ah siamchhuah theih a nih loh avangin Mizoram Sawrkar sum hloh chu cheng nuai 1,839.10 tlinga ngaih a ni.

Thubuai hi PRISM in FIR an thehluh atanga intan niin, hun rei tak ngaihtuah a ni tawh a, kum 2016 khan khatih laia Special Judge, Lucy Lalrinthari chuan, he thubuaia puhte chu hrem turin finfiahna tha a awm lo-a ngaiin thubuai hi a lo titawp tawh a. Court thuremnaah hian thubuai thehluttu PRISM chu an lungawi loh avangin High Court-a an zualko hnuah thubuai hi tihnun thar leh a ni. A tirah chuan he thubuaiah hian mi pali thubuai siamsak an ni a, EE pakhat leh Supplier te thiam loh chantir an lo ni tawh a. Nimin khan he thubuai ngaihtuahtu Special Judge (Prevention of Corruption Act), Dr. HTC. Lalrinchhana chuan, PWD E-in-C hlui Liansanga chu puh a nihnaah thiamloh chantir-in, nimin khan Central Jail-a dahluh nghal a ni a. Court hian Vawiin-ah hrem a nih dan tur a puang nghal dawn a ni.