NGT in Maudarh Quarry chim-ah hma la turin ti

National Green Tribunal (NGT) chuan Maudarh a ABCI Company lung lakna a thawk tunhnaia vanduaina tawka thi mi 12-te chu an chhungte hnenah ralna cheng nuai 20 theuh pe turin a ti.

Boruak leh ramngaw chhe zel tur ven kawnga thuneitu sang NGT hian tunhnai khan Hnahthial District-a Maudarh khua a ABCI company lung lakna chim vanga he Company hnuaia thawk thi ta te chungchangah hian thutlukna siamin vanduaina tawk te hi an chhungte hnenah cheng nuai 20 theuh pe turin a ti a, Mizoram sawrkar chuan ralna pawisa hi ABCI a pektir thei lo a nih chuan State sawrkarin a sumbawm atangin a pe tur a ni, a ti a. Maudarh hmuna lung lak dan phungah hian mihring himna tura dan siam te palzut a ni a, lung halna hman danah pawh mihring himna tur ruahmanna ngaih pawimawh a ni lo niin NGT chuan a sawi a. Mizoram sawrkar aiawha he Tribunal hma a ding Ukil Siddhesh Kotwal pawhin ABCI-in lung an lak dan chu dan kalh niin a sawi bawk.

NGT-in hemi chungchang a ngaihtuahna a Tribunal a thu, an Chairman Justice Adarsh Kumar Goel leh Judicial Member Justice Arun Kumar Tyagi bakah helama mithiam an sawm - Prof. A. Senthil Vel leh Dr. Afroz Ahmad te chuan Mizoram sawrkar chu mihring himna atana thil ngaihtuah tawk lovah leh vanduaina rapthlak tak a thlen hnuah pawh bawhzui tawk lovah an puh a. ABCI hian ralna sum an pe lo a nih chuan Mizoram sawrkarin a pek a ngai dawn a ni, an ti a. Mizoram Chief Secretary chu he chhiatna thlen chhana mawhphurtu, mihring himna ngaihtuah lova lunglak leh lunghalna hman chungchanga mawhphurtu zawng chhuaka hremna pe turin a rawn hriattir bakah Mihring himna atana dan bawhchhiatna a awm a nih chuan a mawhphurtute chu hrem ngei turin a ti a ni.

National Green Tribunal (NGT) chuan Mizoram sawrkar chu Chief Secretary kaihhruaina hnuaiah hemi bawhzuitu tur Joint Committee din turin a rawn hrilh bawk a. Joint Committee-ah hian Ministry of Environment, Forests and Climate Change, Shillong-a Regional Officer; Central Pollution Control Board, Shillong-a Regional Officer; Hnahthial District Bawrhsap; State Pollution Control Board-a Member Secretary; State Disaster Management Authority; Mizoram Geology and Mining Department-a Secretary; Petroleum, Explosives Safety Organization (PESO) aiawh leh Chief Controller of Explosive, Nagpur and IIT Dhanbad aiawhte an tel dawn a. He Joint Committee hian thil thlen dan dik tak leh hremna lek a nih dan report chu thla khat chhungin NGT-ah an thehlut tur a ni.