Lawngtlai-ah Union Minister

Mizoram-a rawn zin Union Minister of State for Food Processing Industries & Jal Shakti Prahlad Singh Patel chuan nimin khan Lawng-tlai District a tlawh.

Union Minister of State Prahlad Singh Patel hian nimin khan Helicopter hmanga Lawngtlai thlengin Mampui khua a tlawh nghal a, Community Hall-ah khawtlang mipuite nen inkawmna hun neiin India rama District hnufualte chawikan tuma Sawrkar laipui hmalakna ah Union Minister-te'n thingtlang khuaa kalchilhin an dinhmun an enfiah mek tih a sawi a, mipuite chu sawrkarin an tana hamthatna a duante chhawr thei tura an dikna leh an chanvo hrechiang a, bawhzui thin turin a chah bawk.

Mampui khawtlang hruaitute leh mipui te hian an dinhmun lo hrilhfiahin, an mamawhte Union Minister of State hnenah hian an lo thlen a. Union Minister of State hian Govt Middle School, Mampui pawh tlawhin, an School a tui dahkhawlna leh inthiarna dinhmun te a enfiah a. Mampui khaw daia Lai Typical Village tlawh bawkin, JJM hnuaia Lawngtlai atanga Mampui khuaa tui pekna tur Lawngtlai leh Mampui inkara PHED lamin tui pipe phum hna an thawh mek chu a enfiah bawk.

Hemi hnu hian Lawngtlai DC Conference Hall-ah District thuneitute nen sawrkar hmalakna thlirletna hun an hmang zui nghal a, Prahlad Singh Patel chuan a enkawl Ministry, Food Processing Industries & Jal Shakti hnuaia mipui hamthatna tur ruahmanna - Pradhan Mantri Kisan SAMPADA Yojana (Scheme for Agro-Marine Processing and Development of Agro-Processing Clusters) leh PM Formalisation of Micro Food Processing Enterprises Scheme (PMFME Scheme) nihphung tlangpui tarlangin, Lawngtlai District mipuite’n an chhawr theih nan theih tawp chhuah turin a chah bawk.

Comments

Popular posts from this blog