Sipai bang leh an thlah te Mizoram leh khawtlang tan mi tangkai an ni - Home Minister

Home Minister Lalchamliana chuan sipai bang te leh an thlahte kal zelte chu Mizoram tan kawng hrang hrangin an thawhhlawk hlein khawtlang tan mi tangkai an nia a hmuh thu a sawi.

5th Bn. Assam Regiment atanga pension chhuaka intelkhawm, Ex-Fighting 5th Association (EFFA) ten an Regiment-in kum 1971-a India leh Pakistan Indonaa Battle Honour of Chhamb Honour an hmuh vawi 51-na hriatrenga hun nimin-a Synod Conference Centre, Aizawl-a an buatsaih a hmanpuina ah Home Minister chuan he thu hi sawiin, Mizoram Sawrkar-ah te, khawtlang nun leh kaihhruaina kawngah te, Kohhran rawngbawlna lamah te leh politics thlengin sipai-a lo tang tawhte thawhhlawkna tam tak sawi tur a awm thu a sawi a. Sipai leh an chhungte chu inthunnna atanga zichhuak an nih angin kawng hrang hranga hmahruaitu nia an thil tha tihna kawngah midang kawhhmutu ni turin he hunah sipai bang leh an chhungte kalkhawmte chu a chah bawk.

Mizoram ang State, sawkar hnaa innghat tamna ah chuan Sipaia tan chu Vawiin thleng pawhin eizawnna tha tak nia a hriat thu Home Minister chuan sawiin, tuna Central Sawrkar in sipai lak dan thar a ruahman, Agniveer Scheme chu thalai te’n an ngaihsak a tul nia a hriat thu a sawi a. Kum engemaw zat kalta atangin IAS Direct Mizo-in kan neih loh leh State pawna Central Sawrkar hna tam tak ah Mizoram atanga tling an awm meuh lo chhan chu Mizoram-ah Sawrkarin a hnuai thawkte dinhmun a tihthat em vangin kan thalai lehkhathiam te hian hmun danga thawh leh hna zawn hi an duh lo hial ta em aw tia a ngaihtuah thu pawh sawiin, hemi lamah hian thalai ten an ngaituahna senga heng Exam a tling ngei turin tan la se a duh thu a sawi bawk.

Home Minister chuan Battle of Chhamb-a Mizo sipaite tawnhriat ziahna lehkhabu ‘Op-Cactus Lily Indo Pak War 1971 (Chhamb Sector, J&K) 5th Battalion The Assam Regiment’ tih chu tlangzarh nghalin, Battle of Chhamb-a tel Mizo sipaten a hunlaia thil thleng leh an tawnhriat ziaka an buatsaih chu thil hlu tak nia a ngaih thu a sawi a, an chanchin chu thamral lovin a awm dawn a ni, a ti bawk.

Kum 1971-a India leh Pakistan indo tuma Jammu & Kashmir a Chhamb khaw bula 5th Assam Regiment ten indona a an huaisenna leh an tihthatna avangin sipai Battalion zawng zawng zingah 5th Assam Regiment hi an indona hmun hming chhalin ‘Honour of Battle’ chu India Sawrkar in a hlan a. Kumtin Chhamb Honour of Battle hi Dec. 5-ah lawm thin niin, kumin ah chuan Dec. 6-ah hman a ni ta zawk a ni.

Comments

Popular posts from this blog