Mizoram-a Heroin man tam ber kum a thleng mek

Excise & Narcotics Department (END)-in kum 1995 atanga an chhinchhiah chinah Mizo-ram-a Heroin man tam ber kum a thleng mek a, kumin thla kua (9) chhunga Heroin an man tawh zat chu kg. 19.97 a tling a. Kumin chhungin Mizoram-ah ruihhlo hmansual vanga thi mi 39 awm tawhin, Police hotute chuan Heroin ti an tam vangin rukruk a hluar niin an sawi bawk.

Excise & Narcotics Department-in an chhinchhiah chinah kum 1995 atanga 2018 thlengin Mizoram-ah kum khat chhunga Heroin man zat chu kg. 10 a tling ngai lo a, hetihlai hian kum 2019 atanga kumin thlengin kg 10 aia tam man ziah a la ni a. Kum 2019-ah kg 12.59 man niin, kum 2020-ah kg. 11.71, kum 2021-ah kg. 18.90 leh kumin September thlengin kg. 19.97 man a ni tawh a. Hemi hnu pawh hian Heroin man hi a awm leh nual tawh bawk a ni.

Chhinchhiahna atangin kumin ah November 24, 2022 thlengin Mizoram-ah ruihhlo (heroin) hman sual vanga thi mi 39 an awm tawh bawk a, heng zinga mi 36-te chu mipa niin mi dang pathum chu hmeichhia an ni a. END ten an chhinchhiah danin kum 1984 atanga kumin thlengin ruihhlo hmansual vanga thi hi Mizoram-ah mi 1,732 an awm tawh a, chung zinga mi 1,528-te chu mipa an ni a, mi dang 204-te chu hmeichhia an ni.

Mizoram Police hotute chuan rukruk thubuai an chhuina ah pawikhawihtu an mante chu Heroin ti an ni tlangpui tih an sawi a, a ti an tam vangin rukruk a hluar nia an hriat thu an sawi a. Rukruk venna atan mipuite mahni In leh hmuna CCTV vuah uar turin an chah a, rukru tam ber chu damdawi hman sual avanga harsatna nei, hmanhmawh taka sum mamawhte an nih tlangpui thu an sawi bawk.

Comments

Popular posts from this blog