Mizoram Governor in NE-a sumdawnna zauh turin Bangladesh sumdawngte a sawm

Governor Hari Babu Kambhampati chuan Bangladesh sumdawngte chu India hmarchhak lamah an sumdawnna huang rawn zauh zel turin a sawm.

Zirtawpni zan leh Inrinni khan Silchar-ah sumdawngte intawhkhawmna, Silchar-Sylhet Festival neih a ni a, he hun kaihruaitu MIzoram Governor Hari Babu Kambhampati chuan, “Silchar leh Sylhet khawpuite chu insumdawn tawnna bakah Culture ang hawi pawha tunhma atanga inzawmna nghet nei tawh an ni a. He inkungkaihna hi ram pahnihte inthian thatna tinghettu atan hman kan duh a ni,” a ti a. India leh Bangladesh chu tunhma atang tawha thiantha an ni tih sawiin he inlaichinna hi kawng hrang hrangah hlawk taka hman tangkai zel nise tha a tih thu a sawi a ni.

Larsap chuan India-in Act East Policy chak takin a kalpui mek tih sawiin, he hmalakna ah inkalpawhna tha ngaihpawimawh a ni tih a sawi a. “Tunah MEA-in KMMTTP Project hmangin Mizoram chu India hmarchhak leh Kolkata Lawngchawlhna kawngpuiah a siam dawn a. He mi project ngaihtuahna nen Bangladesh sawrkar leh sumdawngte chu Mizoram lam lo hawi tel turin ka sawm che u a ni,” a ti bawk.

Thu sawitu dang Dr AK Abdul Momen, Minister for Foreign Affairs, Bangladesh chuan, “India sawrkar leh Bangladesh inlaichinna chu tunhma atangin a tha tawh a. Tunah phei chuan economy thang chak ber pahnih an nih tawh avangin ram pahnihte inlaichinna leh insumdawn tawnna hi khawvel huapin a pawimawh tawh a. India tan Bangladesh chu South Asia-a sumdawnna kawnga a thawhpui lian ber a ni a. Bangladesh tan pawh India chu khawvel pum huapa a sumdawnna kawnga a thawhpui (business partner) lian ber dawttu a ni mek a ni,” a ti a. Bangladesh in sumdawnna kawngah tan a la mek a, India hmarchhak State te nena an sumdawnna phei chu nasa taka tihlen a tum mek a nih thu a sawi bawk.

Silchar - Sylhet Festival 2022 hi Police Parade Ground Silchar-ah neih a ni a. India leh Bangladesh ram ten insumdawn tawnna lian zawk leh ram pahnihte inlaichinna tinghet zual tura he hun hi buatsaih a ni a. Tun tuma Silchar-Syhlet Festival hi a vawikhatna niin India Foundation leh Ministry of Cultural Affair te tangkawp a buatsaih a ni a. He intawhkhawmna a tel tur hian Bangladesh atangin sumdawng leh politician te an zavaiin mi 100 chuang Bangladesh Foreign Minister hoin an rawn kal a. A hawnna inkhawmah hian Governor Hari Babu Kambhampati chu uaptu a ni a. G.Kishan Reddy, Union Minister for Culture, Tourism & DoNER leh Dr AK Abdul Momen, Minister for Foreign Affairs, Bangladesh te chu khuallian an ni thung.