Latest News

Mizoram-a 5G Service hman theih dan tur sawiho

Mizoram Sawrkar hnuaia ‘Working Committee for Roll out of 5G Network’ thutkhawm hmasa ber chu niminpiah khan an Chairman leh Chief Secretary Renu Sharma IAS hovin neih a ni.

India ramah 5G Telecommunication Network hmanga chak taka Data thawnna leh inbiakpawhtheihna hi kumin Oct. 1 khan Prime Minister in a lo tlangzarh tawh a, Mizoram-ah pawh Internet Connectivity tha zawk leh 5G Service kan hman ve thuai theih nan Mizoram Sawrkar chuan Oct. 31, 2022 khan hma latu tur ‘Working Committee for Roll out of 5G Network’ a din a ni.

Working Committee for Roll out of 5G Network thutkhawm hmasa ber Chief Secretary Conference Room-ah neih ah hian Lalramsanga Sailo, Secretary ICT in Mizoram chhunga 5G Service kan hman theih nan a bul tan dan tur leh Department thawhho tulna lai te a sawi a, C. Lalhmachhuana, Director, NELSA, Department of Telecom, Govt of India pawhin presentation pein 5G Services chungchang leh Mizoram a hman a nih ve thuai theih nan a hmalak dan tur hrang hrang leh hmachhawp te a tarlang bawk. India ram khawpui engemawzat leh Airport thenkhat ah Reliance Jio True 5G leh Airtel 5G plus te hman tan mek a ni, India hmarchhak-ah Guwahati a lo thleng tawh bawk a ni.

5G Roll out Committee thutkhawm hian ‘The Mizoram Telecom Infrastructure (Amendment), Policy 2022’, duan mek chu a kaihhnawih Department leh Telecom Company/ Organization hrang hrang te nen sawiho nghal a ni a. Telecom organization te nen March 2023 hmaa Mizoram hmun thenkhata 5G roll out dan tur ICT Secretary kaihhruaina hnuaiah an sawiho leh thuai dawn a ni.

Comments

Popular News (Last 30 Days)