Kum 2000 hnu lamah Mizoram-ah Human Tafficking thubuai 35 awmin mi 64 man an ni tawh

Kum 2000 hnu lamah Mizoram-ah Human Tafficking kaihhnawih thubuai 35 awm tawhin pawikhawihna-a inhnamhnawih mi 64-te man an ni tawh.

State Level Conference on Anti-Human Trafficking chu nimin khan Mizoram Assembly Conference Hall-ah neih niin he hun hmanpuitu Home Minister Lalchamliana chuan khawvel in a buaipui em em mihring hmanga sumdawnna hi Mizoram-ah pawh a hluar chho zel tih sawiin, mihring dikna chanvo inrahbeh sakna lian ber leh sual pawi ber zing a mi a ni tih a sawi a. Kum 2000 hnu lamah Mizoram-ah Human Trafficking case 35 a awm tawh thu sawiin, Hmeichhia 89 leh Mipa 6-te chhanchhuah tawh niin pawikhawihna-a inhnamhnawih mi 64-te man an nih tawh thu a sawi bawk. Home Minister chuan mihring hmanga sumdawn dona kawngah Mizoram Police te inpekna leh hmalakna chu chhuanawm a tih thu sawiin, “State chhung leh pawn lamah nasa takin chhanchhuah hna an thawk thin a ni,” a ti a. Mihring nun tichhe zawnga eizawnna hi a zung atanga phochhuah a ti rem tur chuan Mizoram Police leh pawl hrang hrang thawhhona a pawimawh thu sawiin, a tuartu te chhanchhuah mai piah lamah nunphung pangngaia an nun leh theih nan a chhawmdawl dan thlengin ngaihtuah a ngai hle tih a sawi bawk.

He hunah hian Mizoram DGP Devesh Chandra Srivastva IPS pawhin Mizoram CID te inpekna fakawm a tih thu sawiin, Mihring hmanga sumdawnna hi Mizoram-ah chuan hmeichhia leh naupang chungah a nasa ber a; retheihna leh chhungkaw harsatna vanga tang an tam ber a ni, a ti a. Misualte hian hna tha zawk pek tiamin ramdangah hruaiin an bum ta thin tih sawiin, Placement Company leh pawl hrang hrangte nen tangkawpa hmalak a ngaih thu a sawi a. Tunhnaia Myanmar leh Bangladesh rambuai vanga raltlante chu chhawmdawl an ngai lehzual a, ven an ngai em em a ni, a ti bawk.

Nimin-a Anti-Human Trafficking Conference-ah hian sawm bik pawl hrang hrang Central YMA, MHIP, KTP, MTKP, Salvation Army Hqrs., MZP, Young Chakma Association, Salvation Army Youth leh MUP aiawh te an kalkhawm a, Lalhuliana Fanai, IPS DIG CID & Nodal Officer, AHTU Mizoram chuan a kaihruai a, Mihring hmanga sumdawnna chungchang zirhona leh sawihona neih a ni.