Kumin chhungin kuhva ro vbc. 4.92 hu man tawh

Mizoram Police te chuan kumin chhungin hmun hrang hrangah dan lova Myanmar kuhva rah tawlh ruk bag 4,522 chuang man tawhin hei hi Rs. 4,92,79,675 hu zet a ni.

Mizoram Police thuchhuah tarlan danin, kumin January - November chhungin Mizoram Police chuan District hrang hrang, Aizawl, Champhai, Khawzawl, Saitual, Serchhip, Hnahthial, Kolasib leh Mamit District-ah te Myanmar kuhva ro an man tawh a, Lawngtlai, Lunglei leh Siaha District-ah te man an la nei lo thung a. Hemi hun chhunga Myanmar kuhva ro Mizoram Police in an man tawh zawng zawng chu bag 4,522 leh nylon bag te chi 20 niin Rs. 4,92,79,675/- man a ni a, thubuai 5 ziaklut tawhin mi 8 man an nei tawh bawk.

Mamit District chu Myanmar kuhva ro an man tam ber District niin kumin chhungin bag 1,075 (kg 86,000), Rs. 2,21,25,000 man an man tawh a, Aizawl District-ah bag 408 (kg 27,840), Rs. 65,28,000 man; Champhai District-ah bag 187 (kg 12,050) leh Nylon bag te 20, Rs. 22,68,000 man; Khawzawl District-ah bag 570 (kg. 28,500), Rs. 65,55,000 man; Saitual District-ah bag 920, Rs. 73,02,875 man; Serchhip District-ah bag 357 (kg 19,820), Rs. 10,48,800 man; Hnahthial District-ah bag 70 (kg 2,800), Rs. 1,12,000 man leh Kolasib District-ah bag 935 (kg. 33,300), Rs. 33,40,000 man te an man tawh a ni.

Mizoram Police chuan District hrang hrang Magistrate ten an District chhunga dan phal loh kuhvarah phurhluh leh District kaltlanga phurh khapna order tihchhuah a ni tawh tih pawh tarlang bawkin, dan lova kuhvarah phurh titawp vek turin theihtawp an chhuah zel dawn tih an tarlang bawk.