India in bawlhlawh siam tlem leh bawlhlawh sawngbawlna uar zela Green Economy nih a tum

Mizoram Governor Hari Babu Kambhampati chuan India ram in bawlhlawh siam tlem leh bawlhlawh sawngbawlna uar zela Green Economy nih a tum thu a sawi.

Lehkha khawng bawm chhia lakkhawm hmanga thutthleng Tetra Pak in a siam khuhhawnna nimin-a Raj Bhavan building kawt-a neih ah Governor Hari Babu Kambhampati chuan lehkha chhia hman tangkai chungchanga pawimawh a tih zawng te sawina hun hmangin, Lehkha khawng bawm chhia lakkhawm hmanga Thutthleng tangkai taka siam a ni chu bawlhlawh sawngbawlna kawngah hmasawnna a nih bakah environment chhe zel tur venna atana hmalakna pawimawh tak a nih thu a sawi a. India ram chuan SDG thil tihlawhtling turin tan a la mek zel tih sawiin, COP 27-a LIFE Campaign thil tum pawh tih hlawhtlin a tum tih a sawi a. India ram chuan bawlhlawh siam tlem leh bawlhlawh sawngbawlna uar zela Green Economy nih a tum thu a sawi bawk a ni.

India ram chuan President Chair changing G-20 a hruai dawn tih Governor chuan sawiin, G-20 ram te hian Climate chungchang an ngaipawimawh tur a ni bawk nen, India ram chuan sik leh sa leh kan chhehvel tuamtu boruak chhe mek zel siamthat kawngah hian nasa zawka tanlak a tum chho mek tih a sawi a. Khua leh tui zawng zawng te, a bikin thalai te chu kan ni tin khawsakna ah kan chenna leilung tichhe thei thil te uar lo telh telh turin a sawm bawk.

He hunah hian Himanshu Priyadarshi, Head of Public Affairs and Government Relations- South Asia Tetra Pak in report a pek dan chuan heng thuthleng te hi lehkha khawng- bawnghnute, theitui leh thildangte funna chhia paih tawh lakkhawm atanga siam a ni a. Heng thutthleng te hi a nghet tha viau a, engemaw chen ruah a do thei a, Tlumpi leh rannung te lakah a him tawk niin a sawi bawk. Tetra Pak in Raj Bhavan-ah program an rawn hman chhan chu hetiang thiamna hi Mizoram in a hman tangkai an beisei thu leh bawlhlawh recycled theih te chu bawlhlawh paihna hmunah paih a nih mai loha tangkai taka hman theih a nih dan te mipui zirtir a ni, a ti bawk.