Hnam thenkhat chhiar tura tih sawifiah

Mizoram sawrkar-a Home Department chuan tunhnaia Hnam thenkhat chhiar tura tih chu The Constitution Scheduled Tribe Order, 1950 siamtha tura hmalakna a nih thu an sawi.

Mizoram District hrang hrang Deputy Commissioner-ten an bial chhunga hmalakna kal mekah an khaw chhûnga Hnam thenkhat chungchang Village Council President te an zawhna chu mi thenkhatin hrethiam lovin thil dangah an hmehbel tih hriat a ni tih Home Department thuchhuah hian tarlangin, ‘The Constitution Scheduled Tribe Order, 1950, Part XVII-Mizoram’ hnuaia Hnam chuangte chu Mizoram Union Territory leh State-a hlankai a nih khan Assam chhunga North Cachar Hills District-a Scheduled Tribe chengte ang chiah min hmantir zui tih an tarlang a. He List hian Mizoram-a Hnam chengte a huam kim loh bakah huam loh tur an tel bawk nia tarlangin, “Chumi siamtha tur chuan Home Department hian hun rei tak kalta atang khan hma a la reng a. Hemi hmalakna kal zelah hian Deputy Commissioner-te chu an thuneihna chhung theuh atangin data lakkhawmtir an ni,” an ti a. He thil hi Chhiarpui a ni lo tih tarlangin, “The Constitution Scheduled Tribe Order, 1950 siamtha tura hmalakna mai a nih avangin mipuite lo chiai lo turin kan inngen e,” an ti bawk.