Zan khat riak turin President rawn zin mek; MZU Convocation vawi 17-na a hmanpui nghal

Zan khat riak turin President Droupati Murmu-i chuan nimin khan Aizawl a rawn thleng a, Mizoram University Convocation vawi 17-na chu khuallian niin a hmanpui nghal a ni.

President Droupati Murmu-i hian nimin chawhnu dar 1:47 khan Thlawhtheihna hmangin Lengpui a rawn thleng a, Governor Dr. Hari Babu Kambhampati leh Chief Minister Zoramthanga ten lo dawngsawngin, Indian Army 246 Field Regiment Artillery ten Guard of Honour an pek hnuah MZU Helipad a pan nghal a ni. MZU Convocation vawi 17-na ah hian President chuan zirlai hlawhtling thar, an thawhrimna rah senga Degree tha tak tak awng tharte chu a lawmpui thu a sawi a, zirlai hlawhtlingte zinga an Subject lak bik theuha Gold Medal la thei te leh Book Prize dawngtute chu chhuanawm a tih thu sawiin, Degree nei thar te chu an thiamna leh theihna te khawtlang leh ram hmasawnna atana hmang turin a chah a ni.

India ram Unversity tha zual 100 NIRF in a thlan chhuahah MZU in Ranking sang tak a nei chu ropui a tih thu Visitor of Mizoram University ni bawk Droupadi Murmu chuan sawiin, University naupang tak ni mahse, he hmasawnna hian a thawktute inpekna a zarah kawng engkimah MZU in hma a sawn tih a chiang tih a sawi a. MZU chu a hmuhma a nuam a, ramngaw hnuaiah zirna In tha tak tak a awm belh zel a. He campus chhunga hmalakna chu Eco-Friendly/Environmemt Friendly ni zel se duhthusam a ni tih sawiin, MZU in Research lamah hmasawn zel tuma theihtawp a chhuah leh Technical Education bakah Skill Development lamahte tan a la zel chu tha a tih thu a sawi a. MZU chuan Unversity tha tehna ah sang chho zel turin theihna a nei nia sawiin, tun tum Convocation-ah zirla titha filawr thlanchhuah zingah hmeichhia an tam chu ropui a tih thu leh kawng tinrengah hmeichhiate hmasawnna tur ngaihtuah a ngaih thu a sawi a a. India ramah hmeichhia ten hma an sawn a, hmeichhe dinhmun a that chhoh zel chuan India in nasa takin hma a sawn ang, a ti bawk.

17th Convocation of Mizoram University hi Prof. K.R.S. Sambasiva Rao phalna la hmasain Prof. Lalnundanga, Registrar chuan a hawng a, zirlai hlawhtling te hnenah Degree, Gold Medal leh Prize te hlanna neih a ni a, Gold Medal dawngtute hnenah President in Medal leh thuziak hlanin Doctor of Philosophy 38, Master of Philosophy 6, Master’s Degree 469, Master’s Professional 103, Bachelor’s Degree 109, Bachelor’s Professional 107 an ni a, anni nen hian tun tum Convocation-a Degree dawngtu zat hi zirlai 6826 an ni. Zirlai hlawhtling degree nei thar zingah hian Gold Medalist 52 leh Book Prize Winner mi 16 an awm bawk a ni.