President-in MZU hnuaia building sak 4 leh IIMC Regional Campus sak thar a hawng

Mizoram-a rawn zin mek President Droupadi Murmu chuan nimin tlai khan Mizoram University hnuaia Building sak thar te leh Indian Institute of Mass Communication (IIMC) Regional Centre sak thar te chu a hawng.

Nimin-a President in a hawn tak te hi cheng nuai 2,368.64 senga Mizoram University hnuaia building pawimawh tak tak 4 - Administrative and Academic buildings of Aizawl Govt. College, Mualpui Campus; Cluster of Academic Blocks of Pachhunga University College; Tribal Girl Students’ Hostel at Mizoram University leh Rural Tribal Girls’ Hostel at Sairang, Aizawl District bakah cheng vbc. 25 senga sak Indian Institute of Mass Communication (IIMC) : North Eastern Regional Campus te a ni a.

Heng building sak thar hawnna hunah hian President Droupadi Murmu chuan zirlaite mamawh building tha tak Central leh State sawrkar tangkawpa sak te hawn a ni chu lawmawm a tih thu a sawi a. Heng hmasawnna ruhrel te hi Mizoram chhunga zirna atan pawh hmasawnna liantham a tling tih a sawi a. IIMC te phei chu India rama Journalism zirna tha berin hmarchhak bial-a Campus a rawn siam belh a nih thu sawiin, hei hian India hmarchhak bial-a Media leh Journalism tan hmasawnna a rawn thlen dawn tih a sawi a. Zirna In tha te, zirlai te mamawh building thar te hian zirlai te a ti hmasawnna dawn a ni, a ti bawk.

President in a hawn tak Administrative and Academic buildings of Aizawl Govt. College, Mualpui Campus hi Ministry of DONER atanga Non Lapseable Central Pool of Resources (NLCPR) hnuaia sum hmuh cheng vbc. 12 hmanga sak niin kum 2017 khan a sak hna tanin kum 2021 khan sak zawh a ni a. Pachhunga University College chhunga Cluster of Academic Blocks hi Ministry of DoNER, Govt. of India hnuaia North Eastern Council (NEC) atanga hmuh cheng nuai 456.64 hmanga sak a ni a, he building hi chhawng 3 niin Class room 6 a awm a, zirlai 1080 thut theihna a ni.

Tribal Girl Students’ Hostel, Mizoram University hi cheng nuai 350 senga sak niin Ministry of Tribal Affairs hnuaia Article 275(1) atanga sum hmuh hmanga sak a ni a, October 1, 2020-ah sak tan niin October 30, 2022 khan sak zawh a ni thung. Rural Tribal Girls’ Hostel, Sairang, Aizawl District pawh hi Article 275(1) atanga sum hmuh cheng nuai 350 hmanga sak bawk niin November 2, 2020 khan sak tan a ni a, kumin October 30 khan sak zawh a ni thung.