Union Minister in Mizoram-ah Multi Technology Testing Centre leh Vocational Training Centre a hawng

Mizoram-a rawn zin mek Union Minister of State Kailash Choudhary chuan nimin khan College of Veterinary Sciences & Animal Husbandry, Selesih-a Multi Technology Testing Centre (MTTC) leh Vocational Training Centre (VTC) a hawng.

Cheng vbc. 4.28 senga sak Centre thar hawnna ah hian Union Minister chuan kut hnathawka eizawngte hmasawn nana lokal a nih thu sawiin, Mizoram-ah loneitu, kut hnathawk a eizawngte hmasawnna rahbi atan Farmers' Producer Organization (FPO) din a pawimawh thu a sawi a, central sawrkar chuan FPO ten hamthatna an neihnan Schemes hrang hrang a neih thu leh Pradhan Mantri Kissan Nidhi Yojana hnuaia loneituten hamthatna an dawn theihnan hma a lak nghal tur thu sawiin, Mizoram chu thla hnih hnuah lo tlawh leh a tum thu sawi bawk.

Nimin-a hawn tak MTTC leh VTC hi kum 2019-a sak tan niin kumin 2022-ah sak zawh a ni a, he MTTC leh VTC bakah hian Sangha Dil leh Ran In sak tel a ni bawk a. MTTC leh VTC hi loneitute leh ranvulhtute tana hlawk zawka hman tura buatsaih niin Agricultural hnuaia thlai te, Ser huan, Sangha Dil leh a kaihhnawih thil chi hrang hrangte hlawk zawka ran vulh, sa leh bawnghnute te sawngbawl dan leh sa leh bawnghnute atanga eitur thianghlim leh hrisel tak takte siam inzirtirna tur hmunpui (training, workshop leh a dangte) atan ruahman leh buatsaih a ni. He MTTC leh VTC fel fai tak leh tluang taka kalpui a nih theih nan hian staff 4 leh puibawmtu (Assistant) 2 te dah tel a ni bawk.

CVSc&AH, Central Agricultural University, Selesih hi kum 1998 atang khan BVSc&AH Class hi neih tan niin tunah hian BVSc&AH, MVSc leh Ph.D zirna te a awm mek a. College hian Teaching Departments 17 (Teaching Veterinary Clinical Complex leh Instruction Livestock Farm) tel in a nei a, Zirtirtu (Faculty) 50 chuang leh Zirlai 400 chuang bakah Non-Teaching Staff te an awm a ni.

Comments

Popular News (Last 30 Days)

LPG man bithliah thar