Geology & Mining Department-ah hmalak tul ti

Commerce & Industries (Geology & Mining) changtu Minister Dr. R. Lalthangliana chuan India ram hmun dang nen khaikhinin hmarchhak State Geology & Mining Department te chu a hnufum bakah kawng tam taka midang tluk tura hmalak a la ngaih thu a sawi.

India hmarchhak State hrang hranga Geology and Mining Minister-te intawhkhawmna hmasa ber, 1st Northeast Geology & Mining Ministers’ Conclave nimin a Niathu Resort, 7th Mile, Chumoukedima, Dimapur, Nagaland-a neih ah he thu hi sawiin Dr. R. Lalthangliana chuan Mining Legislations mumal tak neih a tul thute, thawktu indaihlohna phuhruk a ngaih thute leh an kutzal-a tla hna pawimawh chi hrang hrangte tha taka an thawh theih nana Budgetary Allocation awmze nei zawk an mamawh thute a sawi a ni.

Heng bakah hian Dr. R. Lalthangliana chuan Minor Minerals Concession Rules kalpui a nih bakah quality tha neih nan ‘Star Rating of Mines/Quarries’ a tul thu te leh hmarchhaka leilung hausakna laihchhuah chungchanga hmalakna tur pawimawh chi hrang hrang a tarlang a, DoNER/NEC Funding Pattern pawh Geological and Mineral Development a tel ve theih nana siamthat a tul thute sawiin, Union Minister leh Ministry of Mines hnuaia official-te chu hmarchhak state te dinhmun dik tak hriatthiam saka, harsatna te sutkian a nih theih nan leh hmarchhak hmasawnna atana kawng awlsam zawk dap sak ngei turin a ngen bawk.

He Conclave hi Union Minister of Mines, Coal & Parliamentary Affairs Pralhad Joshi chuan khuallian niin a hmanpui a, hmarchhak State hrang hranga Geology & Mining Minister-te leh Department hotu pawimawhte bakah ONGC, OIL, NLCIL (Neyveli Lignite Corporation Limited), CIL (Coal India Limited) te an tel bawk a. Mizoram atangin Esther Lalruatkimi, Principal Secretary; Lalthazuala, Director, Geology & Mining; H. Lalbiakkima, Joint Director, Geology & Mining leh Lalremmawia, Deputy Controller of Mines te an tel a ni.