Tanker kang ah 12 thi tawh; A mawhphurtu man

October 29, 2022 tlai-a Tuirial Airfield peng bula tuialhthei phur (Tank Lorry) chesual kang zui ta avanga thi chu nimin thleng khan mi 12 an tling ta a, he vanduaina thlenga mawhphurtu nia hriat chu Police ten an man tawh bawk.

October ni 29, 2022 tlai dar 2:30 vela Tuirial Airfield peng bula tuialhthei phurtu lirthei chesual-ah a tuialhthei phurh te mi thenkhat in an dawh laia he lirthei hi a kan zui avanga hliam tuar te zingah nimin thleng khan nunna chan an la awm belh zel a, nimin chawhma dar 11:20 khan Thangchungnunga (16) S/o TK. Liana, Sesawng Field Veng chu ZMC-ah boral ve lehin he vanduaina thlenga thi chu mi 12 lai an tling ta a ni. Nimin-a boral Thanchungnunga unaupa Sawimuanthanga (22) chu November 9 khan a hliam tuarlo in a lo boral tawh bawk a, an unau hian Tuirial Airfield-a Panhnah la a kal an ni a, he vanduaina thleng ah hian a nau Thangchungnunga chu Tanker kangah hian a tang a, chumi a chhanna lamah chuan an unauin hliam na tak an tuar a, damdawi In a enkawl an nih hnuah an boral zui ta ve ve a ni.

Thudawn danin, tun thlengin he Tanker kang vanga hliam tuar damdawi In-a enkawl mi 6 an la awm a, hliam tuar zinga mi pakhat, Tuirial Airfield mi chuan damdawi In a chhuahsan tawh thung a ni.

Hetihlai hian he vanduaina thlenga mawhphurtu nia hriat chu Police ten an man tawh a, Police thuchhuah tarlan danin, he vanduaina thleng hi a tirah he lirthei chesual khalhtu fimkhur loh vang leh inthlahdah vang leh mipuiin Petrol bua an ruh lai hian mipui zinga tuin emaw mei zuk tuma lighter talhin, kangmei rapthlak tak hi a chhuak ta nia ngaih a ni a. Bawngkawn Police te chuan chik taka chhui zuiin Tuirial Veng tleirawl pakhatin mi pakhat, kawngpui-a lighter chhi alh a Tuirial lam pana tlanchhe ta a hmuh thu a sawi chu rintlak ah ngaiin a hmutu nia sawi hi thu zawhfiah a ni a, Tuirial YMA hruaitute puihna in pawikhawihtu ni ngeia rin TBC. Lallawmawma (28) s/o Lalremliana(L), Tuirial chu Nov. 1, 2022 khan zawn chhuaha man a ni. Police-ten ngun taka thu an zawhfiah hnuah Nov. 2, 2022 khan an inpuang niin kan thulakna chuan a tarlang a ni.

TBC. Lallawmawma hian a inpuanna ah Petrol thal tuma a kal chu mipui an tam avanga a duh anga a thal ve theih loh thu leh chumi vanga a thinrim thu a sawi a, a thal sa bottle-a a ken lai chu lighter hmanga a kan theih leh theih loh a hal chhin thu leh petrol kang chu lei ah paihin kangmei chu a thlen tak thu a sawi a. Hemi hnu hian TBC. Lallawmawma hi an Inah tlanhawin a thil tihsual vanga mi an kan hlum thu leh mi tam tak an hliam thute a hriat hnuah a hrehawm tiin inawhhlum a tum a, a nupui leh a thianpa in an chhanchhuak nia tarlan a ni bawk.