Sum lakluh leh thil neih inmillo-a puhna ah Dr. BD. Chakma chhui turin Lokayukta in ACB a hriattir

Mizoram Lokayukta chuan sum lakluh leh a thil neih inmillo-a Tuichawng bialtu MLA Dr. BD. Chakma puhna chu Preliminary Enquiry tih a nih hnuah chhui chiang turin ACB chu a hriattir a. An sum lakluh zat an sawi aia za zela 40 a tam sum nei ang an ni tih Preliminary Report-ah tarlan a lo ni tawh a ni.

Thudawn danin Tuichawng bialtu MLA Dr. Buddha Dhan Chakma leh a nupui Biro Bala Chakma chu an sum lakluh leh thil neih inmil lovah ngaiin United Chakma Alliance-in December ni 26, 2020 khan Mizoram Lokayukta-ah thubuai an thehlut a, hei hi Mizoram Lokayukta chuan a zirchian hnu-ah chhui zui tlakah ngaiin, Anti Corruption Bureau (ACB) chu nikum January ni 21 khan Preliminary Enquiry ti turin a ti a, hemi bawhzuia an chhui chianna report chu ACB hian kumin September 21 khan Mizoram Lokayukta-ah a thehlut a, Mizoram Lokayukta chuan kumin October ni 11 khan a ngaihtuah a, hemi hnu hian Investigation puitling ti turin ACB hi a hriattir ta a ni.

ACB hian Dr. BD. Chakma chu kum 2013 leh kum 2018 Assembly inthlanpui neih dawna Election affidavit a thehluh hmangin an chhui a, a nupui Birlo Bala Chakma sum lakluhna pawh zirchian nghal a ni a, a pasal-in Election Affidavit-a a tarlan tel loh sum leh ro dang a neih leh neih loh chhui niin Dr. BD. Chakma hian kum 2013 MLA inthlan dawna Election Affidavit-a a tarlan danin an chhungkaw rosum neih zawng zawng hlut zawng belhkhawm chu Rs. 1,71,25,525/- a ni a, kum 2018 inthlan dawna a hausakna chu Rs. 3,34,33,498/- a ni thung a, kum 5 chhunga a hausakna punna chu cheng vbc. 1.63 chuang a tling a. Nov. 8, 2013 leh Nov. 6, 2018 inkara an chhungkua in sumfai leh thildang-a an hmanral chu Rs. 1,74,30,000/-chuang a ni a, an thil neih leh an sum hmanral belh-khawm chu Rs. 3,37,47,068/- a ni.

Hei bakah hian hemi hun chhung veka an sum lakluh leh thilhlu an neih belhkhawm chu Rs. 2,41,04,490/- a ni thung a, an lakluh zat aia tam an neih belhna chu Rs. 96,42,578/- niin an sum lakluh zat an sawi aia za zela 40 a tam sum nei ang an ni tih Preliminary Report-ah hian tarlan a ni bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar