Lokayukta in thubuai chhuitu hran la nei lo

March 11, 2019-a Mizoram Larsap in Chairman a lakluh hnua a taka hna thawk tan, Mizoram Lokayukta chuan Vawiin thlengin thil chhuitu tur, Investigation Wing hran a la nei lo a. Hetihlai hian a din tirh atanga kumin thlengin eiruk thubuai chhui tur 47 a dawng tawh thung.

Thudawn danin Mizoram Lokayukta hian Investigation Wing a la neih loh avang hian Complaint an dawn, chhui chian ngai nia an hriatte chu ACB emaw, CBI emaw an chhuitir thei a. CBI chhuitir tur erawh chuan State sawrkarin phalna a pek a ngai thung a. Mizoram Lokayukta chhinchhiah danin tun thlenga thubuai a dawn tawh 47 zinga 15 chu titawpin, Regular Investigation 14 neih mek a ni a, thubuai 32-ah chhui chianna hmasa/Preliminary Enquiry (PE) neih tawh a ni a, PE Report 28 dawng tawhin, PE la tihfel loh (pending) 13 a awm a, thubuai pathum chu PE neih hmaa chin fel a ni.

Lakayukta hotute hnen atanga ZALEN thudawn danin, Investigation Wing an neih chuan thubuai chhuina kawngah tun aia chak zawkin hna thawh theih a ni dawn a. Sawrkar thuhnuaiah an awm dawn loh avangin sawrkar mi leh sa an chhui pawhin zalen zawkin thil chhui hna an thawk thei dawn bawk a ni. Mizoram Lokayukta hian tun dinhmunah Investigation Wing hran la nei lo mah se Prosecution Wing-ah erawh mi pakhat an nei tawh thung a ni.