Officer thar te hnenah Appointment Letter hlan

Mizoram sawrkarin Mizoram Civil Service Combined Competitive Exam 2022 kaltlanga MCS, MPS, MIS leh MFAS Officer tur a lak tharte chu nimin khan Chief Minister Zoramthanga chuan Appointment Letter a hlan.

Kumin October ni 22-a Prime Minister in hnalak runpui, Rozgar Mela 2022 a tlangzarh tak bawhzuia sawrkar laipuiin State hrang hrangte ti tura a rawn ngen angin he hun hi CM Office Conference Hall-ah hman a ni a, he hunah hian Chief Minister chuan India in zalenna a chan kum 75-na champha puala hnalak runpui kalpui a ni chu lawmawm a tih thu sawiin, kum hnih chhung chu COVID-19 hripui lengin State chauh nilo, ram pum mai sum lama harsatna a thlen avanga hmalakna hrang hrang tithuanawpin, post ruak tam tak pawh hnawhkhah lawk theih a nih loh thu a sawi a. Tunah boruakin ziaawm lam pan in, kawng hrang hrangah hma kan sawn chhoh tan tih a sawi a, hna lak chungchangah pawh hma sawn chhoh zel beiseiawm a tih sawiin, Officer lak tharte chu an hmabakah duhsakna a hlan a ni.

He hun kaihruaitu Chief Secretary Dr. Renu Sharma chuan sawrkar hnathawh chu hamthatna dawn na tur ringawt ni lovin, a hmasa berah chuan mipui rawngbawlna a nih tih vawng reng turin Junior Oficer atana lak tharte chu a chah a. DP&AR Secretary R. Lalramnghaka pawhin mipui rawngbawl tura lak an nih avangin an hnathawh zelna turah theihtawp chhuah turin Officer thar te chu a chah a ni. Appointment Letter pekchhuah te hi mi 34 niin Mizoram Civil Service (MCS) 14, Mizoram Police Service (MPS) 8, Mizoram Information Service (MIS) 4 leh Mizoram Finance & Accounts Service (MF&AS) mi 8 te an ni.

Comments

Popular News (Last 30 Days)

Vawiin-ah HSSLC Exam result

LPG man bithliah thar