Mizoram-ah kumin chhungin Malaria vanga thi mi 8 an awm tawh

Kumin January atanga September thla tawp thleng khan Mizoram-ah Malaria vanga thi mi pariat an awm tawh a, Malaria vanga thihna thlen chhan ber chu in-test tlai vang leh inenkawl tlai vang a nih thu Health Department-a thawktute chuan an sawi.

Thudawn danin kumin chhung hian Mizoram-ah Malaria vei mi 8,447 hmuhchhuah ni tawhin Lawngtlai, Lunglei leh Mamit District-te chu Malaria vei tamna District an ni a, Lawngtlai District chu Malaria vei hmuhchhuah tamna ber niin mi 3,977 hmuh an ni tawh a, hei hi kumin chhunga Malaria vei hmuh atanga chhutin za zela 47 a tling a. Lawngtlai District dawtah Lunglei District niin mi 2,422 hmuh an nih tawh bakah Mamit District-ah Malaria vei mi 1,261 hmuh an ni tawh bawk. Kumin chhunga Malaria vanga thi mi 8 te hi Aizawl West, Lunglei leh Champhai District-ah pahnih theuh leh Lawngtlai leh Serchhip District-ah pakhat ve ve an ni.

Health Department-a thawktute chuan Mizoram-ah Malaria a hluar chho zel tih sawiin, a bik takin khawtlang lamah vei hmuhchhuah an tam zual niin an sawi a. Khawthlang lama Malaria vei an tam chhan chu khaw lum vang nia sawiin Dr. Hmingthanmawii, Joint Director, Malaria chuan, “Khawthlang lamah hian khua a lum a. Hnathawhna ah te kawr ha mang lo ten an awm bakah zing leh tlai-ah thawmhnaw inbel lo ten an awm tam a, hei vang hian hri kai an tam phah a ni,” a ti. Dr. Hmingthanmawii chuan Malaria lakah fimkhur a ngai hle tih sawi bawkin, “Kan khua a sik chuan thisen test vat a pawimawh a. Tunhnaia thi ho pawh hi an in test tlai vang leh inenkawlna an dawn tlai vang a ni a. Hri an kai tih hmuhchhuah anih chuan an lo na (serious) hman tawh a, enkawl a buaithlak tawh thin a ni,” a ti bawk. Chakma leh Tuikuk ten Malaria an vei tlem nia sawi chungchangah, “Heng hnam pahnihte hian puitling bikah chuan natna do theihna (immunity) an nei tha a, mahse naupang bikah chuan he natna thihpui hi an awm ve tho a ni,” a ti bawk.

Dengue chungchang zawhna chhangin Dr. Hmingthanmawii chuan November atang chuan hri vei an tlakhniam an beisei thu leh Dengue erawh a awm reng dawn niin a sawi a. “Dengue hi a awm reng tawh dawn a, chuvangin mitinte hri kai lo tura kan fimkhur a pawimawh a. Kan In leh a vel Thosi tui theihna tur tui tling kan tihbo a, kawr leh kekawr tluan kan inbel a pawimawh bakah thosi hlauh chi kan siam thiam a pawimawh a ni,” a ti. Dengue vanga thi mi 2 chiah an la chhinchhiah chungchang sawiin, “Dengue vanga thi hi mi 2 aia tam pawh an ni mai thei a, mahse keini chuan Elisa test hmanga an vei ngei a ni tih kan finfiah chauh hi kan pawm theih anih avangin thi zat hi an tlem a ni,” a ti bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar