Crime & Economic Offences Police Station hawn a ni

Mizoram Police SP CID (Crime) Mizoram hnuaia Crime & Economic Offences Police Station thar chu Zirtawpni khan Mizoram DGP Devesh Chandra Srivastva IPS chuan a hawng.

 Crime & Economic Offences Police Station thar hawnna MPSOA Conference Hall-a neih ah Deotosh KS Singh IPS, SP CID (Crime) chuan hun hmasa lama CID (Crime), Mizoram-in Economic Offences a lo buaipui tawh dan leh tuna Police Station thar hawn a lo nih dan tlangpui a sawifiah a. Mizoram DGP Devesh Chandra Srivasta chuan Criminal Investigation Department hna pawimawh, Mizoram Police Manual 2005-a lo ziah tawh chu kum 17 hnuah a taka tihhlawhtlin a ni leh hemi atana Notification chhuah atanga ni 23 chhung leka Police Station hawn theih a ni chu lawmawm a tih thu a sawi bawk.

Crime & Economic Offences Police Station hi SP CID (Crime), Mizoram Office building, Bungkawn, CID Complex, Aizawl-ah awmin Mizoram pum tana thawk tur an ni a, kum 2008 khan sawrkarin Economic Offences lam vila chhui turin ‘Wing’ a din a, DIG CID chu Chairman niin, SP CID (Crime) chu Nodal Officer a ni a, SDPO/DySP 16 leh District tina Police Station 35-a OC-te chu Investigation Team an ni. Kum 2010 khan SP CID (Crime) hnuaia Staff awmsa pawt thenin Economic Offences Wing (EOW) Branch din zui a ni a, sum leh pai inbumna chhui te, FIU-IND Suspicious Transaction Report (STR) chhui te, Mizoram Protection of Interests of Depositors Act 2002/2019 hnuaia case mipui pawisa tihchingpenna chhui te, Non-Banking Financial Companies leh Unincorporated Bodies (UIBs) vil hna te an thawk thin a ni.