Ministry of Road Transport & Highways in kawng siam nan vbc. 6,664 min rawn pe dawn - Chief Minister

Chief Minister Zoramthanga chuan Union Minister of Road Transport & Highways Nitin Gadkari-in Mizoram kawng siamna tura sum pek tur a puan thu sawiin, Vairengte atanga Kawnpui kawng laiha compensation buaina awm pawh chinfel a ni ta mek niin a sawi.

MNF Party in nimin-a Aizawl Mizo Hnam Run-a Chhung Inkhawm an neih ah MNF President leh Chief Minister Zoramthanga hian Nov. 11, 2022-a National Highways siam hnathawh chungchang enhona Meeting Guwahati-a neih chungchang sawiin, Mizoram hmun hrang hranga kawng siam nan cheng vbc. 6,664 chu Union Ministry of Road Transport & Highways chuan an rawn pe dawn tih a sawi a. “Zorinpui - Longmasu inkar 2-lane kawng km 28 a thui vbc. 764 man tur te, Vairengte - Sairang inkar 4-lane (Package 7 & 8 km 21 a thui vbc. 1,400 man tur te, Aizawl by-pass road 2-lane km 32 a thui, hmun thum-a leiverh tur km 2.5 nen vbc. 3,000 leh Seling – Tuivai inkar 2-lane kawng km 122.5-a thui vbc. 1,500 te a ni,” a ti a. MoRTH Minister hian Mizoram rawn tlawh thuai a tum thu leh lei pahnih rawn present a tum niin a sawi bawk.

Chief Minister chuan Vairengte atanga Kawnpui kawng laiha Compensation buaina awm pawh chinfel a ni ta mek tih sawiin, “Forest lamah buaina a awm tawh lo tura ngaih a ni a, a hmu turte'n Compensation an hmu thuai thei tawh tur hi a lawmawm hle a ni,” a ti.

Kuhva chungchanga harsatna chu Central lam hmalakna a nih thu pawh Chief Minister chuan sawiin, “Khu lama mawhphurtu ber hi kawh chat tur kan hre lo a, kan hre tan tawh a ni,” a ti a. “Kuhva chungchangah hian Assam, Tripura leh Mizoram te kan mang a ang tlang ta ringawt mai a ni. Assam Chief Minister nen kan inbe thin a, theihtawpin Delhi kan dawr a, Tripura CM pawh a mang a ang ve hle a ni. Mizoram MP pahnih Pu C. Lalrosanga leh Pu K. Vanlalvena pawh kuhva lama harsatna sukiang tur hian theihtawpa hma la turin ka ngen a. Delhi lam hi tih tak takin kan dawr a, kan su mek a, kan sut hlawhtlin thuai ka ring,” a ti bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar